Azərbaycanın qlobal siyasi və iqtisadi arenada artan rolu: Yeni dünya nizamına doğru ŞƏRH
Bakı, 11 aprel, AZƏRTAC
Otuz ildən çox müddətdə müstəqil siyasət həyata keçirən Azərbaycan Respublikası bu gün dünyamızın siyasi arxitekturasının yenidən formalaşmasında Cənubi Qafqazın lider dövləti olaraq fəal iştirak edir. Xüsusilə, 2020-ci ildə İkinci Qarabağ - Vətən müharibəsində əldə etdiyimiz tarixi Zəfər nəticəsində regionda bərqərar olan sabitlik ölkəmiz üçün yeni çoxvektorlu əməkdaşlıq əlaqələrinin yaranmasına rəvac verib.
Bu baxımdan, son illərdə Azərbaycanda dünya beyin mərkəzlərinin qabaqcıl mütəxəssislərinin toplanaraq aktual məsələləri müzakirə etmək üçün əsasları vardır. Regionda, eləcə də dünyada baş verən hadisələrin müzakirə edilməsi, geniş elmi təhlil aparmaqla düzgün qiymətləndirilməsi və marağı olan ictimaiyyətə çatdırılması ənənəvi olaraq məhz Bakı şəhərində, ADA Universitetində baş tutur.
Bunu AZƏRTAC-a açıqlamasında Milli Məclisin deputatı Məzahir Əfəndiyev deyib.
O qeyd edib ki, növbəti beynəlxalq toplantı Prezident İlham Əliyevin iştirakı ilə aprelin 9-da “Yeni dünya nizamına doğru” mövzusunda keçirildi. Həmin forumda Azərbaycan Prezidenti region üçün və dünyada cərəyan edən siyasi proseslərin axarına dair mükəmməl fikirlər səsləndirdi. Keçirilən müzakirələrdə bütün politoloqlar, beyin mərkəzləri bildirdilər ki, doğrudan da dünyamızın siyasi mənzərəsi dəyişir və məhz bu dəyişikliklər fonunda iqtisadi dəhlizlərin, regional əməkdaşlıqların əhəmiyyəti artmaqdadır.
Ölkə Prezidentinin forumda toxunduğu məsələlər Azərbaycanın dünya arenasında baş verən hadisələrə strateji mövqeyini, habelə qlobal çağırışlara verdiyi cavabları nümayiş etdirməsi baxımından olduqca mühüm idi. Dövlətimizin başçısının çıxışı yalnız Azərbaycanın gələcəyə baxışını deyil, həm də ədalətə, beynəlxalq hüquqa və qlobal əməkdaşlığa əsaslanan yeni dünya düzənində ölkəmizin fəal iştirak istəyini ortaya qoydu.
“Təbii ki, həmin çıxışın əsasında Azərbaycanın hər zaman olduğu kimi, bu gün də sülhün və regional təhlükəsizliyin əldə olunmasında maraqlı tərəf, o cümlədən dünya dövlətləri üçün etibarlı tərəfdaş olduğu fikirləri dayanırdı. Təsadüfi deyil ki, dövlətimizin başçısının iştirakçıların suallarını cavablandırarkən toxunduğu əsas məsələ məhz Ermənistan-Azərbaycan münasibətləri, Azərbaycanın regionda dayanıqlı sülhün əldə olunması üçün göstərdiyi səylərin diqqətə çatdırılması oldu. Təbii ki, Cənubi Qafqazda təhlükəsizliyin tam təmin edilməsi nəinki iki xalq arasında, eləcə də Amerika qitəsindən, Avropadan Mərkəzi Asiyaya, Çinə qədər bütün xalqlar arasında iqtisadi, mədəni, siyasi, diplomatik əlaqələrin dərinləşməsini, insanların daha yaxşı, rifah içində yaşaması üçün yeni qərarların qəbul olunması baxımından çox vacibdir”, - deyə deputat bildirib.
Regionun aparıcı qüvvəsi, lokomotivi olaraq artıq ölkəmizin geosiyasi əhəmiyyətinin gündən-günə artdığının müşahidə edildiyini vurğulayan Məzahir Əfəndiyev əlavə edib: “Bu, bir tərəfdən münaqişələr nəticəsində qlobal iqtisadiyyatda yaranmış böhran, digər tərəfdən isə Azərbaycanın həm Avropa İttifaqı ilə (Qərb), həm də Mərkəzi Asiya dövlətləri (Şərq) ilə qurmuş olduğu strateji əməkdaşlıq nəticəsində baş verdi. Əminliklə deyə bilərik ki, yeni dünya nizamında beynəlxalq iqtisadi münasibətlərin tənzimlənməsində nəqliyyat və kommunikasiya dəhlizlərinin rolu əvəzsizdir. Dünyamızın siyasi arxitekturasında baş verən dəyişikliklər mövcud logistik yolların yenilənməsini diktə edir ki, burada da hər zaman sülhün, əmin-amanlığın, davamlı inkişafın carçısı olan Azərbaycan Şimal-Cənub, Şərq-Qərb dəhlizlərinin aktiv iştirakçısına çevrilib.
Forum Azərbaycanın iqtisadi potensialı ilə yanaşı, eyni zamanda, ölkələr arasında münasibətlərin dərinləşməsi, ehtiyacı olan dövlətlərə iqtisadi, humanitar yardımların olunması baxımında göstərdiyi səyləri də ortaya qoydu. Türk Dövlətləri Təşkilatı, Qoşulmama Hərəkatı çərçivəsində, COP29-un sədri olaraq ölkəmizin nümayiş etdirdiyi əzmkarlıq, əldə olunan nəticələr görülən işlərin əyani sübutudur.
Beləliklə, bu gün Azərbaycan yalnız regionda deyil, dünya miqyasında da etibarlı siyasi, strateji, iqtisadi tərəfdaş kimi özünü sübut edib. Ali Baş Komandan, Böyük Sərkərdə, Prezident İlham Əliyevin rəhbərliyi ilə dördüncü sənaye inqilabının çağırışlarına uyğun aparılan hərtərəfli, çoxvektorlu fəaliyyət qədirbilən Azərbaycan xalqının, ölkəmizin davamlı inkişafını bundan sonra da təmin edəcək”.
Bölmənin digər xəbərləri
