Azərbaycanın turizm potensialı Moskvada keçiriləcək beynəlxalq sərgidə nümayiş olunacaqdır
Bakı, 7 mart (AZƏRTAC). Azərbaycan martın 16-dan 19-dək Moskvada keçiriləcək “MİTT-2011” beynəlxalq turizm sərgisində təmsil olunacaqdır.
Mədəniyyət və Turizm Nazirliyindən AZƏRTAC-a bildirmişlər ki, ölkəmizin turizm potensialı icarəyə götürülmüş 52 kvadratmetrlik lövhədə rus və ingilis dillərində hazırlanmış bukletlər, broşürlər, CD-lər vasitəsilə nümayiş etdiriləcəkdir.
Nazirliyin turizm şöbəsi turizmin marketinqi və təbliğatı sektorunun aparıcı məsləhətçisi Leyla Verdiyeva, Quba Turizm İnformasiya Mərkəzinin rəhbəri Könül Əliyeva, Azərbaycanda fəaliyyət göstərən 8 hotel və turizm şirkətinin nümayəndələri də sərgidə iştirak edəcəklər.
Sərgi günlərində Azərbaycan lövhəsini ziyarət edənlərə Quba rayonunun turizm potensialı barədə geniş məlumat veriləcək, həmçinin ziyarətçilər bölgənin özünəməxsus şirniyyatlarından dadacaqlar.
Bölmənin digər xəbərləri
