Azərbaycanın U-16 komandası beynəlxalq turnirdə sonuncu oyununu keçirib
Bakı, 28 mart, AZƏRTAC
Martın 28-də Maltada təşkil olunan 16 yaşadək futbolçular arasında UEFA-nın inkişaf turnirində III turun oyunları keçirilib.
AZƏRTAC xəbər verir ki, Azərbaycan millisi ilə Belarus yığması arasındakı görüşün nəticəsinə görə ikinci yerin taleyinə aydınlıq gəlib.
İlk turda Lixtenşteyn yığmasını 8:0 hesabı ilə darmadağın edib, növbəti oyununda meydan sahiblərindən üç cavabsız qol buraxan Rafiq Mirzəyevin yetirmələri bu dəfə də meydanı xalsız tərk ediblər - 1:2. Belə ki, yığmamız ardıcıl ikinci məğlubiyyətini alıb və ikinci pilləni əldən verib.
Komandamızın yeganə qolunu birinci hissədə penalti zərbəsindən Kamran Quliyev vurub. İkinci yeri tutmaq üçün heç-heçə də yığmamızı qane etsə də, millimiz bunun öhdəsindən gəlməyib.
Beləliklə, üç oyunda üç xal toplayan komandamız dörd komanda arasında üçüncü olub.
Qeyd edək ki, turnirin son oyununda Malta ilə Lixtenşteyn milliləri qarşılaşacaq. Lakin bu matçın nəticəsi onların mövqeyinə təsir etməyəcək.
Bölmənin digər xəbərləri
