SİYASƏT
AZƏRTAC Bosniya ictimaiyyətini Azərbaycanın 10 milyonuncu sakininin doğulması barədə məlumatlandırıb
Bakı, 13 aprel, AZƏRTAC
FENA dövlət xəbər agentliyinin saytında “Azərbaycanda 10 milyonuncu sakin doğulub” sərlövhəli məqalə dərc olunub (bax: http://fena.ba/article/1079836/rodjenje-desetmilionitog-stanovnika-azerbejdzana).
Müəllifi AZƏRTAC-ın xüsusi müxbiri Pərvanə Qarayeva olan bu materialda Bosniya ictimaiyyətinə körpə qızın boyu, çəkisi, dəqiq doğulma vaxtı və valideynlərinin adı haqda məlumat verilir.
Məqalədə xüsusi vurğulanır ki, Azərbaycanın on milyonuncu sakininin valideynləri Ermənistan tərəfindən işğal edilmiş Dağlıq Qarabağ regionunun Ağdərə rayonundan olan məcburi köçkünlərdir.
AZƏRTAC-ın xüsusi müxbiri qeyd edir ki, körpənin valideynləri öz uşaqlarının adını Mehriban qoyublar, ölkə Prezidenti İlham Əliyev və birinci xanım Mehriban Əliyeva onları təbrik edib. Məqalədə deyilir: “Valideynlərin öz qızlarına bu adı seçməsi onların Azərbaycanın birinci xanımına xüsusilə ana və uşaqların mühafizəsi sahəsindəki xeyriyyə fəaliyyətinə görə minnətdarlıqlarının əlamətidir”.