BAEA-nın rəhbəri İranla əməkdaşlığın qənaətbəxş olmadığını bildirib
Bakı, 7 iyul, AZƏRTAC
Beynəlxalq Atom Enerjisi Agentliyinin (BAEA) rəhbəri Rafael Qrossi cümə günü deyib ki, nüvə proqramına nəzarət qurumunun İranla əməkdaşlığı qənaətbəxş deyil.
AZƏRTAC xarici KİV-lərə istinadla xəbər verir ki, BAEA-nın rəhbəri Tokioda keçirdiyi mətbuat konfransında bildirib: “İranla əməkdaşlıq davam edir, lakin mənim istədiyim səviyyədə deyil. Mən bunu iranlı həmkarlarıma demişəm”. Qrossi İranın “dondurulmuş” nüvə sazişi ilə bağlı vəziyyəti “mürəkkəb” adlandırıb və əlavə edib ki, qurumun səyləri hazırda dalana dirənib və ona görə də oraya getmək üçün elə bir səbəb yoxdur.
2015-ci ildə imzalanmış İranın nüvə sazişi rəsmi olaraq Birgə Hərtərəfli Fəaliyyət Planı (JCPOA) kimi tanınır. BAEA-nın rəhbəri bu ilin martında Tehrana səfərini xatırladaraq deyib ki, iki tərəf arasında “bir sıra gözlənilən məsələlər” var. “Eyni zamanda, bu sazişin icrası çox ləng gedir. Bu səbəbdən həmin məsələ ətrafında yenidən gərginliyin yaranmasının qarşısını almaq üçün işləri sürətləndirməyə çalışıram”, - deyə Qrossi vurğulayıb.
Bölmənin digər xəbərləri
