Bakı Piano Festivalı – musiqi bayramıdır! - musiqi sənayesinin nümayəndələri qarşıdan gələn festival haqqında
Bakı, 12 iyun, Anara Axundova, AZƏRTAC
İyunun 14-dən 28-dək Bakıda IV Bakı Piano Festivalı keçiriləcək. Festival zamanı həm Azərbaycandan, həm də digər ölkələrdən tanınmış musiqiçilər konsert verəcəklər. Musiqi sənayesinin nümayəndələri qarşıdan gələn musiqi tədbiri ilə bağlı fikirlərini AZƏRTAC-la bölüşüblər.
Natəvan Növrəsli - opera müğənnisi, Azərbaycanın Əməkdar artisti, Bakı Piano Festivalının bədii rəhbəri:
- Mənim üçün Bakı Piano Festivalı sadəcə mədəni hadisə deyil, musiqi vasitəsilə ifadə olunan insan ruhunun əsl bayramıdır. Bu, ənənələrin və yeniliklərin, müxtəlif musiqi janrlarının qovuşduğu, gənc istedadların dünya ustaları ilə bir səhnəni bölüşdüyü bir platformadır. Ən əsası, bu - artistlər, tamaşaçılar, mədəniyyətlər, keçmiş və gələcək arasında dialoq məkanıdır.
Beynəlxalq festivallar bir ölkənin mədəni kimliyinin güclü səfiridir. Onlar qlobal mədəni mübadiləni gücləndirir, qarşılıqlı anlaşmanı təşviq edir və ölkəni beynəlxalq birliyin fəal iştirakçısı kimi mövqeləndirirlər. Ev sahibi olan ölkə üçün belə festivallar yerli musiqi mühiti canlandırır, gənc istedadları ruhlandırır, yaradıcı iqtisadiyyatı dəstəkləyir və milli qürur yaradır. Musiqi sərhəd tanımır - bu, dünyanın ən yaxşı diplomatiyasıdır.
Fortepiano musiqisi Azərbaycanın mədəni irsində xüsusi yer tutur. Qərbi Avropa klassik ənənəsinin milli musiqinin özünəməxsus melodiyası və ritmi ilə sintezi özünəməxsus fortepiano məktəbini yaratdı. Hələ XX əsrdə Üzeyir Hacıbəyli kimi öncüllər bu janrın gələcək inkişafının əsasını qoyublar.
Bu gün də bu miras davam edir. Azərbaycan pianoçuları beynəlxalq səviyyədə tanınır, gənc ifaçılar isə müntəzəm olaraq nüfuzlu müsabiqələrin laureatları olurlar. Müasir bəstəkarlar milli adət-ənənələrə dərindən bağlı qalaraq yeni formaları cəsarətlə kəşf edirlər. Fortepiano Şərqlə Qərbi, keçmişlə gələcəyi, emosiyalarla ağılı birləşdirən körpüdür və Azərbaycanın dinamik mədəni həyatının döyünən ürəyi olaraq qalır.
Valid Ağayev - dirijor, Adana Çukurova Universitetinin Dövlət Konservatoriyasının müəllimi, Mersin Şəhər Orkestrinin dirijoru, “Bakı Piano Festivalı-2025”in iştirakçısı:
- Piano festivalı mənim üçün yayın yaxınlaşmasıdır, Bakıya səyahətdir, musiqi bayramıdır, dostlarla, həmkarlarla görüşdür, yeni insanlarla tanışlıqdır. Bu, bundan sonra növbəti festivala cəmi 350 gün qaldığını düşündüyün bir festivaldır.
Hesab edirəm ki, belə festivalların ölkə üçün böyük əhəmiyyəti var. İlk növbədə, bu və ya digər ölkə və ya digər mədəniyyətlə tanışlıq nəyin sayəsində baş verir – incəsənət və idman sayəsində. Bu cür festivallar Azərbaycanı və mədəniyyətini öyrənən, sonra onu dostları, tanışları arasında daha da tanıdan əcnəbi musiqiçiləri cəlb edir, bəlkə də bunu geniş kütlələrə çatdırır, bu isə çox vacibdir!
Səidə Tağızadə - pianoçu, Azərbaycan Dövlət Uşaq Filarmoniyasının direktoru:
- Mənim üçün Bakı Piano Festivalı sadəcə musiqi hadisəsi deyil. Bu, ruhlanma, görüşlər, təcrübə mübadiləsi və enerji məkanıdır. Burada yeni ideyalar yaranır, istedadlar üzə çıxır, peşəkar və insani əlaqələr yaranır. Hər bir festival musiqinin yaşından, təcrübəsindən və milliyyətindən asılı olmayaraq insanları necə birləşdirdiyinə dair kiçik bir hekayədir.
Belə festivallar xüsusi mədəni ab-hava yaradır. Onlar təkcə ifaçılıq ustalığını qoruyub saxlamağa və inkişaf etdirməyə deyil, həm də cəmiyyətin ümumi mədəni səviyyəsini yüksəltməyə kömək edir. Bir ölkə üçün bu, həmişə bir imicdir, mədəni dialoqdur, dünyaya adət-ənənələrimizi, məktəbimizi, əməkdaşlığa açıqlığımızı göstərmək imkanıdır.
Azərbaycanın fortepiano məktəbi dərin köklərə və yüksək keyfiyyət standartına malikdir. Müəllimlərimizin, ifaçılarımızın, bəstəkarlarımızın adları ilə fəxr edirik. Eyni zamanda, biz yeni fikirlərə, müasir tendensiyalara qarşı çox həssasıq. Bugünkü gənc pianoçular həm ənənələri davam etdirirlər, həm də fəal şəkildə beynəlxalq səhnələrə çıxırlar, müsabiqələrdə iştirak edirlər... Bu, klassik bünövrə ilə müasir baxışın ahəngdar şəkildə birləşdiyi canlı prosesdir.
İki həftə ərzində paytaxtın sakinləri və qonaqlarını müxtəlif janrlı musiqilərdən ibarət geniş konsert proqramı gözləyir. “Bakı Piano Festivalı-2025” çərçivəsində incəsənət tədbirləri, sərgilər, teatr quruluşları, ədəbi müsabiqə və cemseyşenlər də planlaşdırılıb. Festivalın xüsusi fəxri – “We Are the Future” gənc istedadların konsertidir.
Bölmənin digər xəbərləri
