Bakıda beynəlxalq ekologiya sərgisi keçiriləcək
Bakı, 17 noyabr, Əziz Məmmədov, AZƏRTAC
Noyabrın 18-dən 20-dək “Bakı Ekspo Mərkəzi” sərgi kompleksində ətraf mühitin mühafizəsi məsələlərinə həsr edilmiş CTE 2015 “Xəzər: ətraf mühit üçün texnologiyalar” sərgisi keçiriləcək. Azərbaycan Ekologiya və Təbii Sərvətlər Nazirliyinin və İDEA (International Dialogue for Environmental Action - Ətraf Mühitin mühafizəsi üzrə beynəlxalq dialoq) İctimai Birliyinin dəstəyi ilə keçirilən sərginin təşkilatçısı Caspian Event Organisers şirkətidir.
AZƏRTAC xəbər verir ki, sərgi ərəfəsində keçirilmiş mətbuat konfransında ekologiya və təbii sərvətlər nazirinin müavini Firdovsi Əliyev çıxış edib. O, sərginin əhəmiyyəti barədə söhbət açaraq bildirib ki, bu tədbirin əsas məqsədlərindən biri ətraf mühit problemlərinə insanların diqqətini cəlb etməkdir. F.Əliyev xatırladıb ki, Azərbaycan Prezidenti 2010-cu ili respublikamızda Ekologiya İli elan etmişdi. Bununla əlaqədar müxtəlif tədbirlər keçirilib, spesifik sahələr üzrə elektron resurslar yaradılıb, əhali arasında maarifləndirmə işləri aparılıb.
“İTE Group”-un icraçı direktoru Edvard Stroon qeyd edib ki, bu sərgi Xəzəryanı və Qafqaz regionunda ekologiya və ətraf mühitin qorunması sahəsində ən iri tədbirdir. Sərgidə ətraf mühitin mühafizəsi və təbiətdən səmərələri istifadə sahəsində innovasiya araşdırmaları kompleks şəkildə təmsil olunub.
Sərginin meneceri Jalə Məmmədova bu beynəlxalq sərginin iştirakçıları barədə ətraflı məlumat verib. Qeyd edilib ki, sərgidə 10 ölkədən 35 şirkət iştirak edəcək. CTE 2015 sərgisində Azərbaycan, Almaniya, Çexiya, Rusiya, Türkiyə, İsveçrə və digər ölkələrin şirkətləri bir məkanda toplaşacaqlar. Dalbadal ikinci il bu sərgidə iştirak edən Çexiya milli stendi bu dəfə ölkənin 7 iri şirkəti ilə təmsil olunacaq. Yerli iştirakçıların əksəriyyəti Ekologiya və Təbii Sərvətlər Nazirliyi, Fövqəladə Hallar Nazirliyi, “Təmiz şəhər” açıq səhmdar cəmiyyəti, “Azərbaycan Xəzər Dəniz Gəmiçiliyi” qapalı səhmdar cəmiyyəti kimi dövlət qurumlarıdır. Azərbaycan Təhsil Nazirliyi sərgidə ilk dəfə iştirak edəcək. SOCAR və bp şirkətləri suyun təmizlənməsi, torpağın təmizlənməsi və toksik tullantıların idarə edilməsi texnologiyalarını təqdim edəcəklər.
Bütövlükdə CTE 2015 sərgisində təbii ehtiyatlardan səmərəli istifadə sahəsində ən yeni araşdırmaların nəticələri, bərk tullantıların toplanması və utilləşdirilməsi sistemləri, alternativ energetika avadanlıqlarının müasir nümunələri nümayiş etdiriləcək. Bu il sərgi çərçivəsində “Yaşıllaşdırma, landşaft dizaynı və bağçılıq texnikası” adlı yeni sektor təmsil olunacaq.
CTE beynəlxalq sərgisi işgüzar əlaqələrin genişlənməsinə, təcrübə mübadiləsinə, yeni avadanlıqlarla və bu sahədə yeni meyillərlə tanış olmağa şərait yaradacaq, ətraf mühitin vəziyyətini yaxşılaşdırmaq məqsədilə aparılan işlərə əlavə impuls verəcək.
Bölmənin digər xəbərləri
