Bakıda keçiriləcək “AGF Trophy” turniri üçün Litva millisinin heyəti açıqlanıb
Bakı, 7 aprel, AZƏRTAC
Aprelin 14-dən 16-dək Bakıda Beynəlxalq Gimnastika Federasiyası (FIG) tərəfindən təsdiq olunmuş bədii gimnastika üzrə üçüncü “AGF Trophy” beynəlxalq turnir keçiriləcək.
AZƏRTAC xəbər verir ki, budəfəki yarışda gənc bədii gimnastlara böyüklər də qoşulacaqlar.
Litva milli komandasının Bakı turniri üçün heyəti açıqlanıb. Ölkəni gənclərdən ibarət qrup hərəkətləri komandası təmsil edəcək. Heyətdə Roberta Ranonite, Milana Trikolki, Neda Vaivadaite, Uqne Madzajute, Nikole Sofia Reinsonas və Qabija Saveikaite yer alıblar.
Azərbaycan ilk dəfə 2018-ci, daha sonra isə 2019-cu ildə bu növ üzrə gənclər arasında “AGF Trophy” adlı beynəlxalq turnirə ev sahibliyi edib. Bu yarış böyük gimnastlar üçün aprelin 21-23-də Bakıda keçiriləcək bədii gimnastika üzrə dünya kuboku yarışlarına sınaq xarakteri daşıyacaq.
Üç gün davam edəcək yarışda iştirakçılar həm fərdi, həm də qrup hərəkətləri proqramında mübarizə aparacaqlar.
Qaliblər çoxnövçülük, komanda hesabı və ayrı-ayrı alətlər üzrə müəyyənləşəcəklər.
Bölmənin digər xəbərləri
