BAKIDA KƏND TƏSƏRRÜFATI MƏHSULLARININ NÖVBƏTİ SATIŞ YARMARKALARI KEÇİRİLMİŞDİR
Bakı, 12 sentyabr (AZƏRTAC). Sentyabrın 12-də Bakı şəhərinin rayonlarında əvvəlcədən müəyyən olunmuş yerlərdə kənd təsərrüfatı məhsullarının növbəti satış yarmarkaları keçirilmişdir. Şəhər əhalisinin kənd təsərrüfatı məhsullarına tələbatını ödəmək məqsədi ilə keçirilən yarmarkalara, mövsümə uyğun olaraq, əsasən meyvə-tərəvəz məhsulları çıxarılmışdı.
“Təzə bazar” MMC-nin həyətindəki yarmarkada alıcılara Sabirabad, Zərdab, Gədəbəy, Hacıqabul və digər rayonlardan gətirilmiş 17 tondan çox məhsul, o cümlədən 2,5 ton ət, 0,5 ton ağartı, 5 ton tərəvəz, 3,5 ton meyvə, 3 ton kartof, 4 min yumurta, 50 kiloqram bal təklif olunurdu. Gədəbəyli fermer Arzu Tanrıquliyev yarmarkaya gətirdiyi 5 ton kartof, soğan, kələm, pendir və meyvəni münasib qiymətə satırdı. Fermer hər həftə yarmarkaya məhsul gətirəcəyini bildirdi. Alıcı Solmaz Cavadovanın sözlərinə görə, yaxın ərazidə yaşadığından hər həftə buradan bazarlıq edir, çünki məhsulların qiyməti münasib, keyfiyyəti isə yüksəkdir.
Rabitə və Nəqliyyat Kollecinin həyətində təşkil olunan yarmarkada Kənd Təsərrüfatı Nazirliyinin nümayəndəsi Saleh Zərbəliyev dedi ki, bu gün satışa Salyan, Qusar, Dəvəçi, Astara, Quba rayonlarından gətirilmiş 77,3 ton məhsul çıxarılmışdır. Məhsullar bazardakından 30-40 faiz, hətta bəziləri yarıbayarı ucuzdur.
Yarmarkaya gələn və bu ünvanı əlidolu tərk edən paytaxt sakinləri məhsulların bolluğuna, çeşidlərin müxtəlifliyinə, qiymətlərin münasibliyinə və alış-veriş üçün yaradılan əlverişli şəraitə görə razılıqlarını bildirirdilər.
Badamdar qəsəbəsinin mərkəzində, 239 nömrəli məktəbin yaxınlığındakı yarmarkaya Ağdaş, Salyan, Sabirabad, Quba, Şəmkir, Saatlı, Qazax və digər rayonlardan 26 tondan çox kənd təsərrüfatı məhsulu, Giləzi, Hacıqabul quşçuluq fabriklərindən 9 min 600 yumurta gətirilmişdi.
Geniş çeşidli kənd təsərrüfatı məhsulları ilə yüklənmiş avtomaşınlar əvvəlcədən müəyyənləşdirilmiş yerdə cərgə ilə dayanmışdı. Beyləqandan 5 tondan çox soğan gətirmiş Qulu Məmmədov bu yarmarkaya ilk dəfə məhsul gətirdiyini və yaradılmış şəraitdən olduqca razı qaldığını bildirdi. Yarmarkada əhaliyə təklif olunan pomidorun, xiyarın, qarpızın, yemişin qiyməti bazarlardakından 35-40 faiz ucuz idi. Qəsəbə sakinləri yaradılmış şəraitdən razılıqla danışırdılar.
Metronun “Əhmədli” stansiyasının yaxınlığında, “Azər” ticarət mərkəzində təşkil edilmiş yarmarkada paytaxt sakinlərinə Qəbələ, Qax, Ağcabədi, Biləsuvar, Quba, Salyan, Kürdəmir, Şəmkir və digər rayonlardan gətirilmiş bol meyvə-tərəvəz, ağartı təklif olunurdu. Məhsulların qiyməti bazardakından 20-25 faiz ucuz idi.
Suraxanıda “Günəş” ticarət mərkəzindəki yarmarkada məhsulun bolluğu və çeşidlərin müxtəlifliyi, xüsusilə mövsümi meyvə və tərəvəzin çox olması qiymətlərə də təsir göstərmişdi.
Kənd Təsərrüfatı Nazirliyinin nümayəndəsi Mustafa Rüstəmov bildirdi ki, şəhər sakinlərinə Samux, Daşkəsən, Quba, Biləsuvar, Balakən rayonlarından gətirilmiş 68 ton 400 kiloqram məhsul təklif olunur. Kartof, soğan, yerkökü, kələm, ət, süd, göyərti, xiyar, badımcan, alma, armud, pomidor, lobya, alça, gilas, ərik, şaftalı, qarağat, gavalı, fındıq, göyəm, üzüm və digər məhsullar bazarlarla müqayisədə 20-30 faiz ucuz qiymətə satılır.
“Suraxanı Maşınqayırma Zavodu” Açıq Törəmə Səhmdar Cəmiyyətinin ərazisindəki yarmarkada isə Cəlilabad rayonunun fermerləri satışa 4,9 ton məhsul çıxarmışdılar.
Yarmarkada məhsulların keyfiyyəti ciddi surətdə yoxlanılır, ət və süd məhsulları baytar müayinəsindən keçirilir.
Nərimanov rayonunun Ə.Əliyev küçəsindəki yarmarkaya Xaçmaz, Tərtər, İmişli, Tovuz, Astara, Oğuz və Qobustan rayonlarından 31,9 ton məhsul gətirilmişdi. Kənd Təsərrüfatı Nazirliyinin nümayəndəsi Fərhad Eminov bildirdi ki, alıcılara Giləzi və Goradil broyler fabriklərinin nümayəndələri 10 mindən çox yumurta təklif edirlər.
Nərimanov Rayon İcra Hakimiyyətinin və Kənd Təsərrüfatı Nazirliyinin əməkdaşları yarmarkada məhsulun keyfiyyətinə və qiymətinə nəzarət edirdilər.
######
Bölmənin digər xəbərləri
