BDU-nun dörd tələbəsi ərəb dili üzrə natiqlik müsabiqəsinin qalibi olub
Bakı, 17 iyul, AZƏRTAC
Bakı Avrasiya Universiteti (BAU) ilə Səudiyyə Ərəbistanının Kral Abdulla bin Əbdüləziz adına Ərəb dilinə Xidmət üzrə Beynəlxalq Mərkəzin birgə yaratdığı Ərəbşünaslıq Mərkəzinin təşkilatçılığı ilə respublikamızda fəaliyyət göstərən ali təhsil müəssisələrinin tələbələri arasında natiqlik yarışı keçirilib.
Müsabiqədə Bakı Dövlət Universiteti (BDU), BAU, Azərbaycan Dillər Universitetində ərəb dili üzrə ixtisaslaşan tələbələr iştirak ediblər.
Bu barədə AZƏRTAC-a BDU-dan məlumat verilib. Bildirilib ki, müsabiqənin yekun mərhələsində 25 tələbə iştirak edib. Onlar ərəb dilində mətnlər səsləndiriblər. Münsiflər heyəti müsabiqə iştirakçılarının aydın nitq bacarıqlarını və ərəb dilində onu səlis ifadə etmə qabiliyyətlərini qiymətləndirib.
Bakı Dövlət Universitetinin tələbəsi Mohammedali Axundov müsabiqədə I yerə layiq görülüb. BDU-nun tələbəsi Simuzər Məmmədzadə və BAU-nun tələbəsi Aişə Nəbiyeva II yeri tutublar. III yerə isə BDU-nun tələbələri Yaşar Hüseynzadə, Səbinə Cəbrayılova və BAU-nun tələbəsi Elmira Əhmədova layiq görülüblər.
Bölmənin digər xəbərləri
