BDU-nun Tələbə Gənclər Təşkilatı: Ermənistanın mülki əhalini hədəfə alması müharibə cinayətdir
Bakı, 9 oktyabr, AZƏRTAC
Bakı Dövlət Universitetinin (BDU) tələbə-gəncləri Ermənistan silahlı qüvvələrinin hərbi təxribatlarına dair Bəyanat imzalayıblar.
Bu barədə AZƏRTAC-a BDU-dan məlumat verilib. Bəyanatda deyilir: “Sentyabrın 27-dən başlayaraq Azərbaycan Respublikasının işğal olunmuş ərazilərində yerləşən Ermənistan cəlladları yalnız hərbi mövqelərimizə deyil, Azərbaycanın mülki əhalisinə də ağır texnika və artilleriya vasitələrindən atəş açaraq növbəti müharibə cinayətinə əl atdı.
Ermənistan 30 ildir ki, Azərbaycana qarşı işğalçı siyasətini davam etdirir. Bu ölkənin əvvəlki hökumətləri kimi, indiki rəhbərləri də danışıqların bütün imkanlarından sui-istifadə edərək işğala əsaslanan status-kvonu gücləndirmək üçün daim müxtəlif mexanizmlərdən istifadə etməyə çalışır. Nikol Paşinyanın “Qarabağ Ermənistandır” sərsəm fikri bu dövlətin Azərbaycana qarşı silahlı təxribatlarında da özünü büruzə verdi və beləliklə, danışıqların aparılması üçün bütün mümkün imkanları məhv etdi.
Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyev bütün mötəbər beynəlxalq kürsülərdən Ermənistan rəhbərliyinin çirkin və təxribatçı siyasətini konkret faktlarla ifşa edib, işğalçı qüvvələrin tarixən ərazilərimizdə həyata keçirdiyi separatizm siyasətini, regionda gərginliyin artmasında bilavasitə Ermənistanın rolu olduğunu bildirib, Qarabağın Azərbaycan torpağı olduğunu dünya ictimaiyyətinə bəyan edib.
Təəssüf ki, Ermənistanın dağıdıcı hərəkətləri, qeyri-konstruktiv mövqeyi ucbatından uzun müddətdir davam edən danışıqlar prosesi gözlənilən nəticəni vermədi. İrəvan beynəlxalq birliyin rəyini nəzərə almadı, BMT Təhlükəsizlik Şurasının qətnamələrinin tələblərinə məhəl qoymadı. Üstəlik, bu təcavüzkar ölkə davamlı olaraq silahlı təxribata əl atdı və mülki şəxsləri hədəf almaqla Cenevrə Konvensiyasının tələblərini kobud şəkildə pozdu.
On gündən artıqdır ki, Azərbaycan öz ərazi bütövlüyünü bərpa etmək üçün işğalçı qüvvələrlə mübarizə aparır. Əsgərlərimiz düşmənə dağıdıcı zərbələr endirirlər. Qürurvericidir ki, şanlı ordumuzun rəşadəti böyük uğurların qazanılmasına vəsilə olub, artıq Cəbrayıl şəhəri, neçə-neçə kəndlərimiz, strateji yüksəkliklər işğaldan azad edilib.
Ermənistanın hüquq tanımayan və işğalçı davranışının son nümunəsi Azərbaycanın tarixi Gəncə şəhərini, eləcə də Mingəçevir, Tovuz, Tərtər, Bərdə şəhərlərini və digər ərazilərini raket atəşinə tutması oldu. Ermənistanın mülki əhalini hədəfə alması müharibə cinayətdir. Uşaq, qadın, qoca demədən Xocalı qətliamını törədən Ermənistan 30 il öncə necə idisə, bu gün də öz xislətini dəyişməyib. Ermənistan bu təxribatlarla regionda sülh və sabitliyin bərqərar olunmasına bir daha əngəl olduğunu sübuta yetirdi. Ermənistan insanlığa qarşı daha artıq günah işlətməməsi üçün işğal etdiyi torpaqları dərhal boşaltmalı, terror qrupları ilə əməkdaşlığa son qoymalı, bölgəyə gətirdiyi muzdlu hərbçiləri, terrorçuları qısa müddətdə bölgədən çıxarmalıdır. Otuz il ərzində işğalı sükutla izləyənlər, Azərbaycana qarşı ikili standartlar tətbiq edən bir sıra beynəlxalq təşkilatlar Ermənistanın riyakar simasını görməli və işğal edilən torpaqların həqiqi sahiblərinə verilməsi üçün sözdə deyil, əməli fəaliyyətə keçməlidirlər.
İndi bütün cəmiyyətimizdə böyük ruh yüksəkliyi mövcuddur. Bu gün yeni bir tarix - xalqımızın və dövlətimizin şanlı tarixi yazılır. Biz tarixi ədaləti bərpa edirik, çünki Qarabağ tarixi torpağımızdır. Bizim işimiz haqq işidir və biz zəfər çalacağıq. Şanlı ordumuza şərəfli və haqlı mübarizəsində uğur və zəfər arzu edirik.
Torpaqlarımızın müdafiəsində ayıq-sayıq dayanmağı, ərazi bütövlüyümüzü qorumağı, hərb işinin sirlərinə mükəmməl yiyələnməyi özlərinə şərəfli peşə hesab edən, Vətəni göz bəbəyi kimi qorumağın müqəddəs və məsuliyyətli vəzifə olduğunu dərk edən Azərbaycan gəncliyi Prezident, Ali Baş Komandan İlham Əliyevin əmri ilə ölkəmizin təhlükəsizliyinin təmin olunması, erməni işğalçılarına qarşı mübarizəyə hər zaman hazırdır.
Bu gün kimliyindən asılı olmayaraq hər bir kəs dövlətinin uğurları üçün çalışır, cəbhədə döyüşən məğrur və rəşadətli əsgərlərimizə mənəvi dəstəyini ifadə edir, haqq mübarizəmizi bütün dünyaya yaymaq üçün misilsiz fədakarlıq nümayiş etdirir.
Biz, Bakı Dövlət Universitetinin tələbə-gəncləri bu bəyanatı imzalayaraq, Ermənistan silahlı qüvvələrinin mülki əhaliyə qarşı təxribatları dayandırmasını və Azərbaycan torpaqlarını qeyd-şərtsiz tərk etməsini tələb edir, Ermənistanın beynəlxalq hüququn normalarına hörmətlə yanaşmasını və BMT Təhlükəsizlik Şurasının qətnamələrini dərhal yerinə yetirməsini tələb edirik!
Qarabağ bizimdir!
Qarabağ Azərbaycandır!”
Bölmənin digər xəbərləri
