BDYPİ-nin texniki baxış və qeydiyyat-imtahan şöbələri qeyri-iş günlərində fəaliyyət göstərəcək
Bakı, 18 mart, AZƏRTAC
Baş Dövlət Yol Polisi İdarəsinin (BDYPİ) bayramla əlaqədar qeyri-iş günlərində vətəndaş məmnunluğunun təmin edilməsi məqsədilə paytaxtın Sabunçu və Qaradağ rayonları ərazisində yerləşən texniki müayinə mərkəzləri fasiləsiz olaraq, hər gün saat 09:00-dan 23:00-dək fəaliyyət göstərəcək.
AZƏRTAC xəbər verir ki, bu barədə BDYPİ-nin yaydığı müraciətdə bildirilir.
Bununla yanaşı, qeyri-iş günlərində nəqliyyat vasitələri ilə bağlı qeydiyyat hərəkətlərinin aparılması, həmçinin təyin olunmuş imtahanların keçirilməsi prosesində fasiləsizliyin təmin edilməsi üçün BDYPİ-nin Qeydiyyat-imtahan idarəsində, eləcə də regionlarda fəaliyyət göstərən qeydiyyat-imtahan və texniki baxış şöbələrində xidmət saat 09:00-dan 18:00-dək təşkil olunacaq.
Nəqliyyat vasitələrinin sahibləri və sürücülər asudə vaxtlarının çoxluğunu və yaradılmış imkanları dəyərləndirərək istər texniki baxış, istərsə də qeydiyyat-imtahanla bağlı adi iş günlərdə olduğu kimi BDYPİ-nin aidiyyəti qurumlarına müraciət edə bilərlər.
Bölmənin digər xəbərləri
