Benilüks Azərbaycanlıları Konqresinin sədri Haaqada keçirilən seminarda iştirak etmişdir
Paris, 12 noyabr (AZƏRTAC). Mərkəzi qərargahı Amsterdamda yerləşən Benilüks Azərbaycanlıları Konqresinin mətbuat xidmətindən AZƏRTAC-a bildirmişlər ki, Haaqanın Clingerdael İnstitutunda Vilnüs sammitinə həsr olunan siyasi seminar keçirilmişdir.
Seminarda Avropa Şərq Tərəfdaşlığı proqramı çərçivəsində Gürcüstan, Ukrayna və Moldova ilə iqtisadi-siyasi sahələrdə ümumi razılıq əldə olunması və bu məsələlərlə bağlı sənədlərin imzalanması, həmçinin Azərbaycanın Avropa İttifaqı ilə əməkdaşlıq münasibətlərinin, o cümlədən ölkəmizlə viza rejiminin liberallaşdırılmasına dair planlaşdırılan danışıqlar ətrafında müzakirələr aparılmışdır.
Toplantıda Gürcüstanın Avropaya və Avroatlantik məkanına inteqrasiya naziri Akeks Petraşvili, Litvanın xarici işlər nazirinin müavini Andrius Krivas, Şərq Tərəfdaşlığı və Regional Əməkdaşlıq üzrə Avropa təmsilçisi Konstantinas Vardakis, İsveç və Niderlandın xarici işlər nazirliklərinin şərq tərəfdaşlığı üzrə səfirləri Martin Hagstorm və Drik Jan Kop çıxış edərək Şərq Tərəfdaşlığı Proqramının insan haqları, azad ticarət, viza rejiminin liberallaşdırılması kimi məsələləri əhatə etdiyini diqqətə çatdırmış, bu proqramdan irəli gələn vəzifələrin yerinə yetirilməsinin vacibliyini vurğulamışlar.
Drik Jan Kop Azərbaycana, Gürcüstana, Ukraynaya və Moldovaya etdiyi səfərlər və bu ölkələrdəki vəziyyət barədə seminar iştirakçılarına məlumat vermişdir.
Seminarda iştirak edən Benilüks Azərbaycanlıları Konqresinin sədri Sahil Qasımov ölkəmizin Avropa dəyərlərinə uğurla inteqrasiya etdiyini, Şərq Tərəfdaşlığı Proqramına xüsusi önəm verdiyini bildirmişdir.
Əsgər Əliyev
AZƏRTAC-ın xüsusi müxbiri
Paris
Bölmənin digər xəbərləri
