BERLİNDƏ “AZƏRBAYCANIN İTİRİLMİŞ TORPAQLARI” MÖVZUSUNDA SEMİNAR KEÇİRİLMİŞDİR
Ölkəmizin Berlindəki səfirliyinin əməkdaşlarının, Azərbaycan və türk diasporunun fəallarının, Almaniyada təhsil alan azərbaycanlı tələbə və tədqiqatçıların qatıldığı tədbirdə Frankfurt-Oder Universitetinin məzunu, tədqiqatçı Samir Rzayev və Berlin Azad Universitetinin məzunu, tədqiqatçı Gülşən Bəşirova mövzu ətrafında məruzə etmişlər.
Gənc tədqiqatçılar torpaqlarımızı və xalqımızı ikiyə bölən “Gülüstan” və “Türkməmçay” müqavilələrinin əsas mahiyyətini açıqlamış, qədim Azərbaycan torpaqlarının hissə- hissə ermənilərə “pay edilməsindən” danışmışlar.
Bildirilmişdir ki, 1905-1907-ci, 1918-1920-ci, 1936-cı, 1948-1953-cü illərdə öz tarixi torpaqlarında etnik təmizləmə və soyqırımı siyasətinə məruz qalan milyonlarla azərbaycanlı dəfələrlə didərginliyin, qaçqın və məcburi köçkünlüyün ağrı-acısını çəkməli olmuşdur.
1988-1989-cu illərdə Qərbi Azərbaycanda (indiki Ermənistan Respublikası) öz tarixi torpaqlarında yaşayan 200 mindən çox azərbaycanlı son nəfərinədək deportasiya edilmiş, yüzlərlə soydaşımız vəhşicəsinə qətlə yetirilmişdir.
Ermənistanın hərbi təcavüzü nəticəsində Azərbaycan ərazisinin 20 faizi işğal edilmiş, 1 milyondan cox soydaşımız qaçqın və məcburi köçkün vəziyyətinə düşmüşdür. Ermənistanın işğalı altında olan Azərbaycan torpaqlarında yüzlərlə yaşayış məskəni, ictimai-mədəni tikililər, təhsil və səhiyyə müəssisələri, tarixi mədəni abidələr, məscidlər, ziyarətgahlar, qəbristanlıqlar erməni vandalizminə məruz qalmış, yerlə yeksan edilmişdir.
Məruzəçilər ermənilərin xain niyyətlərini, vəhşi əməllərini, özgə torpaqları hesabına dövlət yaratmaq məqsədli məkrli xislətlərini konkret tarixi faktlarla əsaslandırmışlar.
Tədbirdə mövzu ilə bağlı filmlər, xəritələr, cədvəllər və sənədlər nümayiş etdirilmişdir.
Bölmənin digər xəbərləri
