Bəzi çaylarda sululuğun artımı müşahidə olunub
Bakı, 2 iyun, AZƏRTAC
İyun 2-si saat 9-a olan məlumata əsasən, gecə saatlarında yağan yağışlar nəticəsində respublikanın bəzi çaylarında sululuğun artımı müşahidə olunub.
Bu barədə AZƏRTAC-a Milli Hidrometeorologiya Xidmətinin Hidrologiya Mərkəzinin direktoru Asif Verdiyev məlumat verib.
Onun sözlərinə görə, Masallı rayonunun ərazisindən axan Viləşçayda suyun səviyyəsi 3 sm, Tovuz rayonu ərazisindən axan Zəyəmçayda 2sm, Göygöl rayonu ərazisindən axan Gəncəçayda isə 2 sm artım müşahidə olub.
“Gecə saatlarında yağan yağışlar nəticəsində Türyançay və Göyçay çaylarında suyun səviyyəsinin kəskin artması nəticəsində Zərdab rayonu ərazisindən axan Qarasuçayda suyun səviyyəsi 35 sm artıb və bunun nəticəsində Kür çayının Zərdab məntəqəsində də suyun səviyyəsində 71 sm artım müşahidə olunub. Yaxın günlər ərzində Kür çayının aşağı axınında suyun səviyyəsinin artımı gözlənilir”, - deyə A.Verdiyev bildirib.
Bölmənin digər xəbərləri
