Bişkekdə ulu öndər Heydər Əliyevin Azərbaycan xalqı qarşısında tarixi xidmətlərindən danışılıb
Bişkek, 12 dekabr, AZƏRTAC
Azərbaycanın Qırğızıstandakı səfirliyi İşenalı Arabayev adına Qırğızıstan Dövlət Universitetində (QDU) ulu öndər Heydər Əliyevin xatirəsini anma mərasimi təşkil edib.
Mərasimdə Qırğızıstan Prezidenti Aparatının təmsilçiləri, hökumətin üzvləri, parlamentin deputatları, ictimai-siyasi xadimlər, universitetin professor-müəllim heyəti, tələbələr, Azərbaycan diasporunun üzvləri, jurnalistlər iştirak ediblər.
Tədbirin əvvəlində mərasim iştirakçıları universitetin foyesində ümummilli lider Heydər Əliyevin həyat və fəaliyyətini əks etdirən fotoşəkillərdən ibarət sərgiyə baxıblar. Sonra Ulu Öndər haqqında film nümayiş etdirilib.
QDU-nun rektoru Tolobek Abdıraxmanov bildirib ki, dünya şöhrətli siyasi xadim Heydər Əliyev nadir, sayılıb-seçilən siyasət adamı idi. Güclü şəxsiyyət olan Heydər Əliyevin adı fövqəladə idarəçilik qabiliyyəti, yüksək intellekti sayəsində dünyanın görkəmli siyasətçiləri və dövlət xadimləri arasında həmişə birincilər sırasında çəkilib.
Azərbaycanın Qırğızıstandakı səfiri Hidayət Orucov ümummilli lider Heydər Əliyevin şərəfli ömür yolu, ölkəmizin tarixindəki müstəsna xidmətləri haqqında məlumat verib. Səfir Ulu Öndərin həm keçmiş SSRİ dövründə, həm də müstəqillik illərində Azərbaycana rəhbərlik etdiyi illərdə əldə olunan uğurlardan danışıb. Ümummilli lider Heydər Əliyevin keçmiş SSRİ-nin rəhbərlərindən biri olduğunu diqqətə çatdıran səfir onu dünya şöhrətli siyasətçi, böyük nüfuza malik dövlət xadimi kimi xarakterizə edib. Bildirilib ki, Heydər Əliyevin müstəqil Azərbaycan dövlətinin və dövlətçiliyinin möhkəmləndirilməsi istiqamətində müstəsna xidmətləri olub.
Ermənistan-Azərbaycan, Dağlıq Qarabağ münaqişəsinin sülh yolu ilə həlli istiqamətində Heydər Əliyevin təşəbbüslərindən danışan səfir deyib ki, BMT Təhlükəsizlik Şurası Ermənistan silahlı qüvvələrinin işğal olunmuş Azərbaycan torpaqlarından qeyd-şərtsiz çıxarılması, məcburi köçkünlərin öz ev-eşiklərinə qaytarılması ilə əlaqədar dörd qətnamə qəbul edib. Lakin işğalçı Ermənistan hələ də bu sənədləri yerinə yetirmir və bununla da dünya ictimaiyyətinə meydan oxuyur.
Səfir böyük dövlət xadimi Heydər Əliyevin qırğız xalqına da xüsusi diqqət və qayğı ilə yanaşdığını qeyd edib. “Ulu öndər Heydər Əliyev deyirdi: “Manasın dili bizim ümumi dilimizdir. Biz kökü bir, dili bir olan xalqlarıq”, - deyə diplomat əlavə edib.
Qırğızıstan xarici işlər nazirinin müavini Erines Otorbayev qeyd edib ki, Heydər Əliyevin Azərbaycanın inkişafında böyük rolu olub. O, bütün həyatını xalqına, Vətəninə və dövlətinə xidmətə həsr edib. Nazir müavini bildirib ki, Heydər Əliyev həm də Azərbaycanı vətəndaş müharibəsindən xilas edən dövlət başçısı kimi tarixə düşüb.
Türkiyənin Qırğızıstandakı səfiri Mətin Kılıç Heydər Əliyevin “Bir millət, iki dövlət” kəlamını xatırladıb və bu gerçəkliyinin hər zaman qorunub saxlanacağını qeyd edib.
Qırğızıstan Xalqları Assambleyasının sədri, akademik Bektemir Murzuibraimov, Tarix və Sosial Hüquqi Təhsil İnstitutunun direktoru Nazira Kurmanova, Qırğız-Türk Manas Universitetinin rektoru Sebahaddin Balcı, Qırğızıstanın Əməkdar İnşaatçısı, müharibə veteranı Əsəd Həsənov və başqaları böyük siyasətçi Heydər Əliyevin fenomen bir şəxsiyyət olduğunu, onun təkcə Azərbaycan xalqı deyil, bütün türk dünyası qarşısındakı xidmətlərindən söhbət açıblar.
Qulu Kəngərli
AZƏRTAC-ın xüsusi müxbiri
Bişkek
Bölmənin digər xəbərləri
