BMT son zəlzələlərdən sonra Əfqanıstana yardımını genişləndirir
Bakı, 12 sentyabr, AZƏRTAC
Əfqanıstanın şərqində baş verən son zəlzələlərdən sonra BMT-nin təşkilatı olan Beynəlxalq Miqrasiya Təşkilatı (BMqT) yardımın miqyasını genişləndirir
AZƏRTAC xəbər verir ki, bu barədə BMT öz saytında məlumat yayıb.
Məlumata görə, BMqT zərər çəkmiş, evlərindən didərgin düşmüş və sığınacaq, çadır, yorğan və zəruri əşyalara ehtiyacı olan 134 min insana kömək etmək üçün təcili olaraq 16,8 milyon dollar tələb edir.
"Əhalinin tibbi yardıma, psixososial dəstəyə, eləcə də təmiz su və gigiyena vasitələrinə ehtiyacı var. Qadınlar və qızlar indiki şəraitdə, o cümlədən şəxsi həyatın olmaması səbəbindən risk altındadırlar", - məlumatda deyilir.
Qeyd edək ki, avqustun 31-də və sentyabrın 4-də baş verən güclü zəlzələlər Əfqanıstanda ciddi dağıntılara səbəb olub. Zəlzələ nəticəsində 2100-dən çox insan həlak olub, 3600-dən çox insan yaralanıb. Ən çox dağıntılara Kunar, Nangarhar əyalətləri və Laqmanın bir hissəsi məruz qalıb.
Beynəlxalq Miqrasiya Təşkilatının məlumatına görə, zərər çəkmiş əyalətlərdə təxminən 3,7 milyon insan, o cümlədən 800 minə yaxın məcburi köçkün və geri qayıdan əfqan miqrantlar yaşayır.
Bölmənin digər xəbərləri
