AZƏRTAC-ın Afinadan aldığı xəbərə görə, Beynəlxalq Olimpiya Komitəsinin prezidenti Jak Roqq BOK-un Yunanıstan paytaxtında keçirilən 116-cı sessiyasında gözlənilməz bəyanatla çıxış etmişdir. O, yunanları tərifləyərək, onların təşkilat xərclərinin xeyli hissəsinə qənaət etdiklərini bildirmişdir.

J.Roqq gələcək olimpiadaların paytaxtlarını da Afinadan nümunə götürməyə və həddən çox məbləğdə vəsait sərf etməməyə çağırmışdır.

Xatırlatmaq lazımdır ki, yunanlar Olimpiadanın təkcə təhlükəsizliyinin təmin olunmasına 1 milyard avro xərcləmişlər.

BOK prezidenti dopinq yoxlamaları ilə rüsvayçılıqların sayının getdikcə artması məsələsindən danışaraq demişdir: “Qəribə olsa da, bu, ruhlandırıcı işarədir. Bu işarə sübut edir ki, dopinqlə mübarizə güclənir və bədbəxt idmançıların hiylələrə əl atması getdikcə çətinləşir”.