Bölgədə sülh istəməyənlər Zəfər savaşından dərs almasalar, tarix təkrarlana bilər
Bakı, 15 aprel, AZƏRTAC
Bu günlərdə Laçın istiqamətində baş verənlər bir daha göstərdi ki, Ermənistan çirkin planlarından əl çəkmək niyyətində deyil. Aprelin 11-də Gorus rayonun Dığ yaşayış məntəqəsi istiqamətində Ermənistan silahlı bölmələrinin təxribatına ordumuz tərəfindən layiqli cavab verildi. Zəfər savaşında kapitulyasiyaya məcbur olan düşmən son vaxtlar ayrı-ayrı xarici ölkələrin hərbi və siyasi dəstəyi ilə yeni revanşa ümid edir. Fransanın diplomatik separatizminə və xaricdən alınan silahlara güvənən Ermənistan yenə də Azərbaycan dövlətinin qüdrəti qarşısında rəzil vəziyyətə düşdü. Hərbi təxribata ordumuzun layiqli cavabı bir sıra siyasi nəticələri də ortaya qoydu. Ermənistan bu dəfə də təxribatçı əməlini Azərbaycanın üzərinə atmağa çalışdı, amma bu iftira kampaniyası bir daha iflasa uğradı.
AZƏRTAC xəbər verir ki, bu fikirləri Milli Məclis sədrinin müavini Fəzail İbrahimli söyləyib.
F.İbrahimli bildirib ki, dünyanın mühüm informasiya agentlikləri bu hadisəni məhz Azərbaycanın öz suveren hüquqlarını müdafiə etməsi kimi qiymətləndirdi. Hərbi təxribatın hər iki ölkə rəhbərinin danışıqları davam etdirmək üçün ABŞ dövlət rəhbərliyi tərəfindən Vaşinqtona dəvət olunacağı barədə xəbərlər yayılan vaxtda baş verməsi bir daha onu göstərdi ki, Ermənistan sülh əldə olunmasında, problemin aradan qaldırılmasında maraqlı deyil. Bu isə, heç şübhəsiz, Paşinyan hökumətinin son vaxtlar yeganə istinad nöqtəsi bildiyi Qərb dairələrinin narazılığına səbəb oldu. Məhz bu səbəbdən Ermənistan Xarici İşlər Nazirliyinin hadisə baş verəndən sonra Avropa İttifaqının müşahidə missiyasının komandirini Dığ kəndi istiqamətindəki erməni mövqelərinə getməsi üçün yalvarışları nəticəsiz qaldı. Avropa İttifaqı missiyasının alman rəhbəri hətta erməni hərbçilərin müşayiəti ilə kəndi ziyarət etməkdən boyun qaçırıb və bununla da Avropa İttifaqının missiyasına arxalanan İrəvanın xəyallarını puç etdi.
“İrəvan başa düşməlidir ki, onun arxalanacağı, dil tapacağı, razılaşacağı tək ünvan var - o da Azərbaycandır. Təəssüf ki, şovinist erməni rəhbərliyi hələ də bu həqiqəti dərk etmir və vəziyyəti daha da gərginləşdirir. Azərbaycanın Naxçıvan Muxtar Respublikasının Şahbuz rayonunun Ermənistanla sərhəd ərazisində əlverişsiz hava şəraitində məhdud görmə səbəbindən azaraq itkin düşən azərbaycanlı əsgərə ermənilər tərəfindən işgəncə verilməsi bunun bir nümunəsidir. Cəbhədə və diplomatik masada tam məğlub olan işğalçı rejim sanki silahsız əsirdən qisas alır. Əslində ermənilər həmişə əsir və girov götürdüklərinə işgəncə verib, fiziki təzyiqlərə məruz qoyublar. Xocalı soyqırımını törədənlərdən bundan artığını gözləmək də sadəlövhlük olardı. Ancaq Azərbaycan ərazisinə oxşar səbəbdən keçən ermənilərlə həmişə xoş rəftar olunub və indiki olayda dünya bir daha erməni xislətinin gerçək üzünə şahid oldu”, - deyə parlament sədrinin müavini əlavə edib.
O vurğulayıb ki, Azərbaycan dövləti və ordusu təkbaşına bütöv bir orduya qorxu yaşadan Mübariz İbrahimovun nəşinin Vətənə gətirilməsinə, bayrağına həqarətin cəzasını verən Ramil Səfərovun azadlığına nail olmaqla, öz dədə-baba yurdlarını ziyarət etdikləri üçün əsir alınan Dilqəm Əsgərov və Şahbaz Quliyevi Vətənə qaytarmaqla gücünü sübut edib. İndi əsgərimizə qarşı edilənlər də cavabsız qalmayacaq. İndiki halda bizim cavabımız həm hüquqi, həm siyasi, həm də diplomatik çərçivədə verilir. Lakin həmin işgəncəni verənlər qat-qat artıq cəzalarını almalıdır. Vətən müharibəsində illərlə törədilən erməni vəhşiliyinin qisasını Azərbaycan Ordusu aldı. Ordumuz heç bir addımı cavabsız qoymayacaq. Əsgərlərimiz Vətənə qayıdacaq, amma bu gedişlə xəstə erməni şovinizminin icraçıları olan erməni əsgərlərinin xeylisi nəinki vətəni, hətta həyatları ilə vidalaşmalı olacaq. Bunu isə əgər analıq hissləri varsa, erməni anaları düşünməli və Fransanın, digər xarici güclərin boş bəyanatlarına güvənən Paşinyan hökumətindən övladlarının təhlükəsizliyini tələb etməlidir.
“Ermənilər dərk etməlidirlər ki, Azərbaycan heç bir halda şəhidlərinin bir damla qanını da yerdə qoymayacaq, bir qarış torpağını belə düşmənə verməyəcək. Azərbaycan təkcə Ermənistana qarşı yox, həm də onun havadarlarına qarşı mübarizə aparır. Amma dünyadakı qeyri-müəyyənliklərdən faydalanmaq istəyən güclər Azərbaycanın tək olmadığını da bilməlidirlər. Türkiyə öz qardaşı Azərbaycanla sonsuzadək birlikdədir. Azərbaycanla bağlı kirli və qanlı plan quranlar Şuşa Bəyannaməsini unutmasınlar. Onlar Türk dünyasını da gözardı etməməlidirlər. Bölgədə sülh istəməyənlər 44 günlük Vətən müharibəsindən ibrət dərsi almalı və ciddi nəticələr çıxartmalıdırlar. Əks təqdirdə, tarix təkrarlana bilər”, - deyə Fəzail İbrahimli qeyd edib.
Bölmənin digər xəbərləri
