bp ilə enerji tərəfdaşlığının inkişafı müzakirə edilib
Bakı, 19 iyun, AZƏRTAC
Energetika naziri Pərviz Şahbazovla bp şirkətinin baş icraçı direktoru Mürrey Aukinklossun rəhbərlik etdiyi nümayəndə heyəti arasında görüş olub.
Nazirlikdən AZƏRTAC-a bildirilib ki, görüşdə şirkətlə neft-qaz və bərpaolunan enerji sahələrində əməkdaşlıq əlaqələrindən məmnunluq ifadə edilib.
Müxtəlif enerji növlərindən istifadənin enerji təhlükəsizliyi, ətraf mühitin qorunması və davamlılıq məsələlərinin həllində mühüm rolu vurğulanıb. Bu kontekstdə Azərbaycanın nümunəvi ölkə olduğu, bp şirkəti ilə neft-qaz sahəsində başlayan əməkdaşlığın hazırda bərpaolunan enerji layihəsi - “Şəfəq” günəş elektrik stansiyası ilə uğurla davam etdirilməsi xüsusi qeyd edilib.
Söhbət zamanı mövcud enerji layihələrinin inkişafı, həmçinin “yaşıl enerji dəhlizi” və interkonnektorlarının icrası nəzərdən keçirilib. Qlobal enerji bazarlarında inkişaf tendensiyaları ilə bağlı fikir mübadiləsi aparılıb. Həmçinin görüşdə nümayəndə heyətinin tərkibində iştirak edən bp-nin Azərbaycan, Gürcüstan və Türkiyə üzrə təyin olunmuş yeni regional prezidenti Ciovanni Kristofoliyə gələcək fəaliyyətində dəstək ifadə edilib.
Bölmənin digər xəbərləri
