BQXK-nın öz prinsiplərinə zidd davranışı: Erməni maraqlarına xidmət
Bakı, 11 sentyabr, Elmir Səftərov, AZƏRTAC
Beynəlxalq humanitar təşkilatları digər qurumlardan fərqləndirən əsas cəhət siyasi tərəf müqabili olmaması, hər hansı dövlətin marağına xidmət etməməsidir. Hazırkı mürəkkəb geosiyasi situasiyada nizamnaməsində “müstəqil” qeyd olunan təşkilatların əksəriyyətinin Qərb təsisatlarının maraqlarına uyğun davrandığının şahidi oluruq. Beynəlxalq Qırmızı Xaç Komitəsi (BQXK) də bu qəbildəndir. Belə ki, sentyabrın 9-da Rusiya Qızıl Xaç Cəmiyyətinin yük avtomobili (RQXC) Azərbaycanın Qarabağ iqtisadi rayonunda yaşayan ermənilərə ərzaq çatdırmaq məqsədilə Ağdam-Əsgəran yolu ilə Xankəndi şəhərinə getmək üçün yola çıxmışdı. Humanitar yükün sentyabrın 10-da Xankəndi istiqamətinə keçidi nəzərdə tutulmuşdu. Amma məlum olduğu kimi, TIR-ın göndərilən ünvana çatdırılmasına Qarabağ iqtisadi rayonunda olan separatçılar və BQXK tərəfindən süni maneələr yaradılır. Buradan belə bir sual yaranır. Qarabağda yaşayan erməni əsilli sakinlərin, özləri dedikləri kimi, əgər həqiqətən də ərzağa ehtiyacları varsa, bəs niyə Azərbaycanın 14 gündür buraxılmayan, Rusiyanın isə sentyabrın 10-da çatdırmalı olan humanitar yüklərini qəbul etmirlər? Bunun cavabı isə çox sadədir. Görünən odur ki, Qarabağda, ermənilərin dediyi kimi, heç də "humanitar böhran" yaşanmır. Sadəcə, separatçılar "Laçın" dövlət sərhədindən buraxılış məntəqəsindən öz istəklərinə uyğun istifadə etmək və əvvəlki kimi, yoldan qanunsuz məqsədlər üçün faydalanmaq istəyirlər. Çünki Azərbaycanın Qarabağ iqtisadi rayonunda olan qanunsuz erməni silahlılarının maddi-texniki bazası gücləndirilməlidir ki, onların varlığı mövcud olsun. Bu da ölkəmizə qarşı birbaşa təhdid vasitəsidir və bölgədə separatçılığın davam etməsini təşviq edir.
Həmin qanunsuz erməni birləşmələri isə yenidən təxribatlara əl ataraq ərazilərimizdə minalar basdırır, Ordumuzun mövqelərini mütəmadi olaraq atəşə tuturlar. Lakin dövlətimiz öz suveren ərazilərində bu cür qanunsuz hərbi birləşmələrin mövcudluğuna imkan verməyəcək. Son proseslər də Azərbaycanın bu mövzuda qətiyyətli olduğunu sübut edir. Görünür ki, bu prosesdə Ermənistan tək deyil, onlara bəzi Avropa dövlətləri və beynəlxalq təşkilatlar tərəfindən dəstək göstərilir.
Diqqətçəkən digər məsələ isə Ermənistanın Rusiyaya ümidsiz və inamsız yanaşma sərgiləməsi ilə bağlıdır. Ermənistanın və erməni xalqının inamsızlığı 44 günlük Vətən müharibəsindən sonra daha da dərinləşdi və bu, hələ də davam edir. Hiss olunur ki, Ermənistan özünə yeni dayaqlar axtarır, ona görə də Rusiya hərbi bazasını və hərbiçilərini çıxarmaq niyyətindədir. Yəqin ki, Fransa başda olmaqla, bəzi Qərb dövlətlərindən şirin vədlər alan Ermənistan həmin qüvvələrin ambisiyalarını bölgəyə daşımaq niyyəti güdür. Həmçinin BQXK və onun Qərb himayədarları Ermənistana təlqin edirlər ki, Rusiyadan gələn yükləri qəbul etsən, eyni yolla Azərbaycandan göndərilən yardımı da almaq məcburiyyətində qalacaqsan. Bu kimi səbəblərə və bölgədə böyük dövlətlərin maraqlarının kəsişdiyinə görə vəziyyət çıxılmaz xarakter alıb. Amma Rusiyanın göndərdiyi humanitar yük Ağdam-Xankəndi yolundan buraxılsa belə, bu, Azərbaycanın öz prinsiplərindən geri çəkilməsi anlamına gəlməməlidir.
Yaranmış vəziyyətdə toxunulmalı olan digər məqam isə BQXK-nın öz nizamnaməsinə uyğun davranmaması ilə bağlıdır. Qarşılıqlı anlaşmanı, bütün xalqlar arasında dostluğu, əməkdaşlığı və davamlı sülhü təşviq etməli olan, milli, irqi, dini inanclara görə ayrı-seçkiliyə yol verməmək barədə öhdəlik götürən BQXK bu gün öz prinsiplərinə zidd davranış sərgiləyir. Belə ki, Beynəlxalq Qırmızı Xaç Komitəsi ikili standartlar nümayiş etdirərək həm Qərb dairələrinin, həm də Ermənistanın maraqlarına cavab verən addımlar atır. Məsələn, Fransanın ölkəmizlə razılaşdırmadan, suveren ərazilərimizdən keçməkdən ötrü icazə almadan Azərbaycanın Qarabağ iqtisadi rayonuna yardım göndərməsinə BQXK tərəfindən heç bir təsir göstərilmir, hətta dəstək ifadə olunur. Amma Rusiyanın ölkəmizlə razılaşdıraraq Azərbaycanın təklif etdiyi yoldan apardığı humanitar yükün çatdırılmasına süni maneələr yaradılır. Əgər BQXK 1949-cu il Cenevrə Konvensiyasına, öz mandatına və nizamnaməsinə əməl edirsə, nəyə görə ölkəmizin qanunvericiliyinə uyğun davranmır? Bu qurum, sadəcə olaraq, nüfuzlu Avropa dövlətlərinin maraqlarına xidmət edir, onların istəklərini yerinə yetirir. Humanitar qurumun bu cür davranışı dünyada insanların güvənlə yaşamasına, həyat və sağlamlıqlarının qorunmasına da təhdiddir.
Bölmənin digər xəbərləri
