Britaniya ABŞ mallarına cavab tarifləri üçün 400 səhifəlik siyahı hazırlayır
London, 4 aprel, AZƏRTAC
Böyük Britaniya hökuməti ABŞ Prezidenti Donald Trampın yeni gömrük tariflərinə cavab olaraq siyahı hazırlayır.
AZƏRTAC “The Independent”ə istinadla xəbər verir ki, əgər iki ölkə arasında ticarət sazişi əldə olunmasa, Britaniya 10 faizlik idxal tariflərinə qarşı ABŞ-dan gətirilən mallara vergi tətbiq edə bilər.
Böyük Britaniyanın biznes və ticarət üzrə dövlət naziri Conatan Reynolds Tramp administrasiyasının Britaniya məhsullarına tətbiq etdiyi 10 faizlik tariflərə cavab olaraq, hökumətin 417 səhifəlik məhsul siyahısı üzərində işlədiyini deyib. Siyahıya Burbon viskisi və motosikletlər də daxil olmaqla müxtəlif məhsullar daxildir.
Britaniya hökuməti mayın 1-dək 10 faizlik tariflərin azaldılması ilə bağlı razılığa gələ bilməsə hökumət ABŞ-dan idxal olunan məhsullara cavab tarifləri tətbiq edə bilər. Hazırda hökumət Britaniya şirkətləri ilə məsləhətləşərək, bu yeni tariflərin mümkün iqtisadi təsirlərini qiymətləndirir və hansı məhsulların cavab siyahısına daxil edilməli olduğunu müəyyənləşdirir.
Kiçik Bizneslər Federasiyası (FSB) bildirib ki, kiçik və orta sahibkarlıqla məşğul olan firmaların təxminən 32 faizi artıq bu tariflərin təsirini hiss edib.
Aytən Abbaslı
AZƏRTAC-ın xüsusi müxbiri
London
Bölmənin digər xəbərləri
