Britaniya Avropa vətəndaşlarına yeni səyahət icazəsi tətbiq edir
London, 2 aprel, AZƏRTAC
Britaniya hökuməti uzunmüddətli səyahət qaydalarını dəyişərək Avropadan gələn turistlər üçün yeni onlayn giriş icazəsi - elektron səyahət icazəsi (ETA) tətbiq edib.
AZƏRTAC “Reuters”ə istinadla xəbər verir ki, yeni qayda bu gündən etibarən qüvvəyə minir.
Rəsmi açıqlamada bildirilir ki, bu sistem təhlükəsizliyi artırmaq və giriş proseslərini sadələşdirmək məqsədi daşıyır. ETA sistemi artıq ABŞ, Kanada və vizasız rejimlə Britaniyaya səfər edən digər ölkələrin vətəndaşlarına tətbiq olunur.
Yeni qaydalar çərçivəsində Avropa İttifaqı ölkələrinin vətəndaşları yaxın günlərdə 10 funt-sterlinq (təxminən 12 avro) qarşılığında ETA almaq üçün onlayn müraciət edə biləcəklər. Lakin 9 aprel tarixindən etibarən bu məbləğ 16 funt-sterlinqə yüksələcək.
İcazə üçün müraciət edən şəxslər öz şəkillərini, şəxsi məlumatlarını təqdim edir və müəyyən uyğunluq və cinayət keçmişi ilə bağlı suallara cavab verirlər. ETA təsdiqləndikdən sonra elektron şəkildə pasporta bağlanır. Bu icazə iki il ərzində Britaniyaya 6 ayadək müddətdə qeyri-məhdud sayda səfər etməyə imkan verir.
Aytən Abbaslı
AZƏRTAC-ın xüsusi müxbiri
London
Bölmənin digər xəbərləri
