Britaniya hökuməti sosial müavinətlərlə bağlı islahatlar elan edib
London, 19 mart, AZƏRTAC
Britaniya hökuməti sosial müavinət sistemində çoxsaylı dəyişikliklər elan edib.
AZƏRTAC BBC-yə istinadla xəbər verir ki, məqsəd 2030-cu ilə qədər illik 5 milyard funt sterlinqə qədər qənaət etməkdir.
İş və Pensiyalar üzrə dövlət naziri Liz Kendall bu islahatların daha çox işə yönəlmiş sistem yaradacağını və insanları işə cəlb etməyə təşviq edəcəyini bildirib. Dəyişikliklərə əsasən, daha yüngül sağlamlıq problemləri olan şəxslərin əlillik müavinəti alması çətinləşəcək. Mövcud müavinət alanlar üçün sağlamlıqla bağlı əlavə ödənişlər dondurulacaq, yeni müraciət edənlər üçün isə bu məbləğ təxminən yarıya qədər azaldılacaq.
Bundan əlavə, 22 yaşdan aşağı şəxslərin sağlamlıq vəziyyətinə görə universal kredit əlavələri almaq hüququ məhdudlaşdırıla bilər.
Hökumət gözlənilən qənaətin dəqiq bölgüsünü açıqlamasa da, əsas qənaətin əlillik müavinətlərinə dair yeni qaydalarla bağlı olacağı bildirilir.
Qeyd edək ki, COVID-19 pandemiyasından sonra sağlamlıq və əlilliklə bağlı müavinətlərə ayrılan xərclər sürətlə artıb. Hazırda bu xərclər illik 65 milyard funt təşkil edir və 2029-cu ilə qədər 100 milyard funta çatacağı proqnozlaşdırılır.
Aytən Abbaslı
London
Bölmənin digər xəbərləri
