Britaniya məhkəmələrinə həbsxanalarda yer çatışmazlığı səbəbindən hökmləri təxirə salmaq tapşırılıb
London, 24 avqust, AZƏRTAC
Britaniyada məhkəmələrə həbsxanalarda sıxlıq böhranı səbəbindən növbəti həftələrdə bəzi cinayətkarların həbsə göndərilməsini təxirə salmaq tapşırılıb.
AZƏRTAC xəbər verir ki, məhkəmə menecerlərinə göndərilən bu göstəriş, məhkəmələrin iş yükünü nəzarətdə saxlayan yüksək vəzifəli hakim Lord Castis Grin tərəfindən verilib. O, həbs cəzası alma ehtimalı olan, ancaq hazırda zaminə buraxılan bəzi cinayətkarların hökmünün təxirə salınmasını məhkəmə menecerlərinə tövsiyə edib. Rəsmi rəqəmlər göstərir ki, İngiltərə və Uelsdə həbsxana yerlərinin sayı azalıb və hər bir müəssisədə cəmi bir neçə yer qalıb.
O, hər bir işin fərdi qaydada nəzərdən keçirilməli və qərarların ədalət mənafeyi əsasında verilməli olduğunu da əlavə edib.
Qeyd edək ki, sentyabrın 10-dan etibarən İngiltərə və Uelsdəki həbsxanalarda həddən artıq sıxlığı aradan qaldırmaq üçün bəzi məhkumlar cəzalarının 40 faizini çəkdikdən sonra azadlığa buraxılacaq. Bu isə yeni proqramın tətbiqindən sonra ilk bir neçə ayda təxminən 5500 məhbusun azadlığa çıxması demək ola bilər.
Aytən Abbaslı
AZƏRTAC-ın xüsusi müxbiri
London
Bölmənin digər xəbərləri
