Britaniyada 100 min vergi ödəyicisinin hesabı sındırılıb
London, 6 iyun, AZƏRTAC
Böyük Britaniyanın Vergi Xidməti (HMRC) 100 min vergi ödəyicisinin hesablarının sındırıldığı kiberhücum nəticəsində 47 milyon funt sterlinq itkiyə məruz qalıb.
AZƏRTAC “Reuters”ə istinadla xəbər verir ki, bu barədə ölkənin Xəzinə Komitəsində keçirilən dinləmələrdə məlumat verilib. Rəsmilərin sözlərinə görə, ötən ildən başlayan kiberhücum təşkilatlanmış cinayət xarakteri daşıyır və 100 min nəfərin hesabları bloklanıb. Hazırda həmin şəxslərlə əlaqə saxlanılır. HMRC-nin baş direktoru Con Pol Marks bildirib ki, bu hücum vergi ödəyicilərinin təxminən 0,2 faizini əhatə edib.
Hücum HMRC sistemindən kənarda əldə olunan fərdi məlumatların istifadə olunması ilə həyata keçirilib. Pol Marks bildirib ki, cinayətkarlar bu məlumatlarla ya yeni hesablar yaradıblar, ya da mövcud hesablar üzərindən özlərinə geri ödəniş almağa cəhd ediblər. Bu iş üzrə araşdırma aparılıb, Böyük Britaniya xaricində də bəzi həbslər həyata keçirilib.
AZƏRTAC-ın xüsusi müxbiri
London
Bölmənin digər xəbərləri
