Britaniyanın rəsmi sikkəsində “Ulduz müharibələri” filmindən “Minilliyin şahini” təsviri yer alıb
Bakı, 19 mart, AZƏRTAC
Böyük Britaniyanın Kral Zərbxanası “Ulduz müharibələri” filminin personajları ilə birinci uğurlu seriyadan sonra yeni sikkə kolleksiyasını təqdim edib.
AZƏRTAC xarici mediaya istinadla xəbər verir ki, ekran əsərinin yaradıcılarının Böyük Britaniya ilə uzunmüddətli əlaqələri var, çünki həmin orijinal trilogiyanın çox hissəsi məhz bu ölkədə lentə alınıb.
İkinci seriyanı “Ulduz müharibələri” kainatında uydurulan və Xan Solo ilə köməkçisi Çubakko tərəfindən idarə edilən “Minilliyin şahini” (“Millenium Falcon”) adlı kosmik gəmi açır. “Şahin”in kapitanı lap əvvəldən Lendo Kalrissian hesab olunurdu, amma Xan Solonun da V epizodda söylədiyi kimi, təmiz oyunda udduğu üçün o, gəminin sahibi olub və kapitan rütbəsi alıb.
Bu il daha sonra üzərində “TIE Fighter” standart imperiya qırıcıları, Qiyamçı alyansın əsas universal ulduz qırıcı təyyarəsi “X-Wing” və “Ölüm ulduzu - 2” hərbi kosmik stansiyasının təsvirləri olan sikkələr zərb olunacaq. Onların dizayneri amerikalı kinorejissor Corc Lukasın ekran əsərini birinci seriyada sikkələrdə təcəssüm etdirən Fion Qvillimdir.
Sikkələr altı guşəlidir və mis-nikel ərintisindən hazırlanıb. Hər birinin çəkisi 8 qram və diametri 27 millimetrdən bir qədər çoxdur.
Hər bir sikkənin nominal dəyəri 50 pensdir. Arxa tərəfdə Böyük Britaniya Kralı III Çarlzın profili var.
Bölmənin digər xəbərləri
