SİYASƏT
Brüssel görüşü Bakı ilə İrəvan arasında sülh səylərinə zərbə vura bilər ŞƏRH
Bakı, 6 aprel, AZƏRTAC
Cənubi Qafqaz regionu siyasi manevrlər və strateji düşüncə meydanı olmaqda davam edir. Aprelin 5-də Brüsseldə keçirilən görüşün dünya ictimaiyyəti üçün o qədər də maraqlı olmamasına baxmayaraq, Azərbaycanın maraqları nəzərə alınmadan aparılan bu tipli danışıqlar qlobal sabitliyin daha da pozulması istiqamətində ciddi risklər yaradır və Bakı ilə İrəvan arasında sülh sazişinin bağlanması səylərinə zərbə vura bilər, o cümlədən rəsmi İrəvanın sülh prosesində söz sahibliyi tamam itirilə bilər.
Bu fikirləri AZƏRTAC-a açıqlamasında beynəlxalq əlaqələr üzrə ekspert Masil Dəmirov söyləyib.
O bildirib ki, bu tədbirdə iştirak edən ABŞ-ın Dövlət katibi Antoni Blinkenin Azərbaycanın narahatlığına cavab olaraq, vəziyyəti aydınlaşdırmaq məqsədilə əvvəlcədən Prezident İlham Əliyevə zəng etməsinə baxmayaraq, nəticə bunun əksini göstərir. Brüsseldə Ermənistanla təhlükəsizlik və əməkdaşlıq məsələlərinin müzakirə olunduğu görüşdə Azərbaycanın maraqlarına toxunulmayıb. Bu baxımdan Azərbaycan rəhbərliyinin bu hadisəyə reaksiyasının konstruktiv və birmənalı olması normaldır. Brüssel görüşünə hazırlıq prosesində Ermənistana hərbi yardım və birgə hərbi təlimlərin keçirilməsi, Azərbaycanla həmsərhəd ərazilərdə hərbi infrastrukturun yaradılması, Ermənistanın Avropa İttifaqının Avropa Sülh Fondunun xətti ilə silahlanması kimi məsələlər müzakirə olunub. Bu addımlar, təbii ki, anti-Azərbaycan xarakteri daşıyır və regionda gərginlik, təxribat mənbəyinə çevrilir.
Azərbaycanın ABŞ-la ikitərəfli münasibətləri inkişaf etdirməkdə maraqlı olduğunu, o cümlədən iqlim dəyişikliyi və yaşıl texnologiyalar sahəsində əməkdaşlığa çalışdığını deyən ekspert əlavə edib: “Cənubi Qafqazda uğurlu qarşılıqlı fəaliyyət üçün bütün tərəflərin maraqlarını nəzərə almaq və qarşılıqlı faydalı şərtlərlə dialoq aparmaq lazımdır. Azərbaycanın regional sabitlikdə rolu danılmazdır”.
M.Dəmirov xatırladıb ki, bu ilin fevralında Münxen Təhlükəsizlik Konfransı çərçivəsində Prezident İlham Əliyevlə görüşdə Antoni Blinken ölkəsinin Azərbaycanla müxtəlif sahələrdə əməkdaşlığı genişləndirmək niyyətində olduğunu vurğulayıb. Blinken, həmçinin COP29 çərçivəsində iki ölkənin nümayəndə heyətlərinin təmaslarını qeyd edib.
“Dünən keçirilən görüş isə Qərbin regionda müsbət münasibətilə bağlı şifahi bəyanatlara baxmayaraq, ciddi suallar yaradır. Sadə dillə desək, belə görüşlər ola bilər, amma sırf humanitar xarakter daşınan halda. Unutmaq olmaz ki, Ermənistan coğrafi baxımdan bütün güclərin maraqlarının eyni vaxtda toqquşduğu tarixi mürəkkəb regionda yerləşir. Qlobal məsələlərin, o cümlədən təhlükəsizlik məsələlərinin Azərbaycanın iştirakı olmadan müzakirə edilməsi isə, beynəlxalq hüququn əsaslarını və əməkdaşlığın inkişafını sarsıdır. Azərbaycandan yan keçərək, regionda nələrisə etməyə çalışan istənilən güc qazancdan daha çox itirəcək. Azərbaycan bu gün dünyanın siyasi xəritəsində ciddi dövlətdir və bununla hesablaşmaq mütləqdir. Ona görə də dünya liderləri öz qərarlarında Azərbaycanın mövqeyini və maraqlarını nəzərə almalı, qarşılıqlı hörmət və etimada əsaslanan konstruktiv dialoqa səy göstərməlidirlər. Əks halda, Azərbaycan amilinə məhəl qoymamaq münaqişənin daha da kəskinləşməsinə və sabitliyə təhlükə yarada bilər. Bu, dövlətimizin Azərbaycanın milli maraqlarını və mövqeyini qətiyyətlə və əsaslı şəkildə qoruyaraq regiondakı proseslərə təsir etmək üçün böyük imkanlarından xəbər verir. Prezident İlham Əliyevin rəhbərliyi ilə Azərbaycan uğurlu balanslaşdırılmış və praqmatik xarici siyasət yeritməklə, dünya miqyasında mövqeyini möhkəmləndirir, eyni zamanda, regionun ən mühüm aktoruna çevrilməklə, xalqının təhlükəsiz və xoşbəxt gələcəyini təmin edən mühit yaradır”, - deyə ekspert vurğulayıb.