Bu gün “UEFA U-17” Avropa çempionatında daha dörd görüş keçiriləcək
Bakı, 6 may, AZƏRTAC
Bu gün 17 yaşadək futbolçular arasında Avropa çempionatının final mərhələsi çərçivəsində birinci turun daha dörd qarşılaşması oynanılacaq.
AZƏRTAC xəbər verir ki, “C” və “D” qrupunun komandaları ilk oyunlarına çıxacaqlar.
Günün ilk matçında “C” qrupunda çıxış edən İtaliya millisi Serbiya komandası ilə görüşəcək. İştirakçı olduqları bütün yaş qruplarındakı turnirlərin favoritlərindən sayılan İtaliya millisi bu dəfə də daha şanslıdır. Görüş Suraxanı qəsəbə stadionunda keçiriləcək və qarşılaşmaya saat 14:00-da start veriləcək.
“C” qrupunun 15:30-da başlayacaq oyunu isə Şüvəlandakı “Dalğa Arena”da Hollandiya və İspaniya milli komandaları arasında keçiriləcək. Matçın olduqca gərgin keçəcəyini proqnozlaşdırmaq olar.
Saat 19:00-da isə “D” qrupunun iki oyununa eyni vaxtda start veriləcək. “Dalğa Arena”da Fransa ilə Danimarka, Suraxanı qəsəbə stadionunda isə İngiltərə ilə İsveç üz-üzə gələcəklər.
Bölmənin digər xəbərləri
