Bu il Cəlilabadda 568 kiloqram barama tədarük edilib
Cəlilabad, 22 iyun, Bağır Əliyev, AZƏRTAC
Baramaçılıq Cəlilabad rayonu üçün qeyri-ənənəvi təsərrüfat sahələrindən olsa da, rayonda bu sahəyə maraq ilbəil artır. Bu il rayonda 18 təsərrüfata 40 qutu ipəkqurdu paylanılıb. Rayonda 568 kiloqram barama tədarük edilərək qəbul məntəqələrinə verilib.
Bu barədə AZƏRTAC-ın bölgə müxbirinə Cəlilabad Rayon Dövlət Aqrar İnkişaf Mərkəzindən məlumat verilib.
Bildirilib ki, ipəkqurdu toxumlarının dövlət tərəfindən verilməsi və bu sahədə bazarın olması rayon sakinlərinin baramaçılığın inkişafına olan marağını artırıb. Rayonda baramaçılığın inkişafı üçün əlverişli yem bazası yaradılıb.
Son iki ildə Cəlilabadda Çindən gətirilmiş 25 min tut tingi əkilib. Kümçülər də şəxsi təsərrüfatlarında yem tədarükü üçün tut ağaclarının sayını artırırlar.
Bölmənin digər xəbərləri
