Bundan sonra aparılacaq danışıqların gedişində şərtləri Azərbaycan müəyyənləşdirəcək
Bakı, 10 oktyabr, Səadət Hakıyeva, AZƏRTAC
Humanitar atəşkəsin təmin edilməsi, əslində, münaqişənin həllində birinci mərhələdir və bu sənədin detallarına dəyişmiş status-kvo fonunda baxmaq daha məqsədəuyğundur. Birtərəfli şəkildə atəşkəsin qəbul edilməsi Ermənistanın mövqeyinə xidmət etmiş olardı. Əsas məsələ ondan ibarətdir ki, hazırda münaqişə bölgəsində 30 ildir davam edən status-kvo dəyişdirildi, təmas xətti isə artıq yoxdur. Vəziyyəti Azərbaycan öz siyasi iradəsi və Silahlı Qüvvələrinin gücü hesabına dəyişdi. Halbuki status-kvo ATƏT-in Minsk qrupunun həmsədrlərinin Ermənistana təzyiqi ilə dəyişdirilə bilərdi. Lakin vasitəçilərin fəaliyyətsizliyi, işğalçının cəzasız qalması bölgənin təhlükəsizliyini şübhə altına alırdı. Nəticəsiz danışıqlar, vasitəçilərin əhəmiyyətsiz, əksər hallarda isə ikili standartlara söykənən bəyanatları prosesi ölü nöqtədən tərpətməyə imkan vermirdi. Yaranmış vəziyyət isə həm vasitəçiləri, həm də işğalçını qane edirdi. Təbii ki, Azərbaycan öz milli məsələsi olan Dağlıq Qarabağ münaqişəsi ətrafında vəziyyətin sona qədər bu cür davam etməsi ilə razılaşa bilməzdi.
Bu fikirləri AZƏRTAC-a açıqlamasında Milli Məclisin deputatı Könül Nurullayeva bildirib.
K.Nurullayeva diqqətə çatdırıb ki, bu gün hərbi və siyasi müstəvidə dəyişən status-kvo Ermənistanın işğal siyasətinə ən böyük təzyiqdir. İşğalçı artıq təhlükəsizlik zəmanətindən məhrum olub. “Moskva danışıqlarının detallarına nəzər salsaq aydın olur ki, Ermənistanın təhlükəsizlik zəmanəti ilə bağlı absurd təklifləri olsa da, işğalçının bu istəyi qəbul olunmayıb. Yeni razılaşmada da Ermənistanın separatçı qurumu üçüncü tərəf kimi münaqişəyə cəlb etmək istəyi rədd edildi. Artıq diplomatik danışıqlar da tam fərqli məcrada davam edəcək. Vaxtilə imtina etdiyi baza prinsiplərini qəbul etməyə məcbur olan Ermənistan bu gün beynəlxalq hüquqdan danışmaq haqqının olmadığını yaxşı dərk edir. Artıq işğalçı ölkə mövcud vəziyyətdən status-kvonun uzadılması üçün istifadə edə bilməyəcək. Paşinyanın şərtlər irəli sürmək imkanları da artıq tükəndi”, - deyən deputat diqqətə çatdırıb ki, bundan sonra aparılacaq danışıqların gedişində şərtləri Azərbaycan müəyyənləşdirəcək və Azərbaycana qarşı hər hansı şərtlərin irəli sürülməsindən söhbət gedə bilməz. İmitasiya xarakterli danışıqlar da müzakirə mövzusu ola bilməz. Rəsmi Bakı yalnız nəticəyə hesablanmış danışıqların davam etdirilməsinin tərəfdarıdır. Beynəlxalq vasitəçilər və dünya birliyi də anladı ki, Dağlıq Qarabağ Azərbaycanın milli məsələsidir. Kənar təzyiqlərə rəğmən, Azərbaycan rəhbərliyi üçün milli maraqlar ən ali dəyərdir. Uzun illərdir Ermənistan tərəfdən gözardı edilən BMT Təhlükəsizlik Şurasının qətnamələrinin icrası üçün zəmin yaranıb.
Bölmənin digər xəbərləri
