Bütün tarixi abidələrin pasportu olacaqdır
Bakı, 19 iyun (AZƏRTAC). Azərbaycandakı bütün tarixi abidələrin pasportları hazırlanacaqdır. Buraya həm yerli, ölkə, həm də dünya əhəmiyyətli abidələr daxildir.
Mədəniyyət və Turizm Nazirliyindən AZƏRTAC-a bildirmişlər ki, artıq ölkədəki tarixi abidələrin pasportlaşdırılmasına başlanılmışdır. Cari il ərzində 64 vahid milli tarixi abidənin pasportu hazırlanacaqdır. Bunun üçün xüsusi qrup yaradılmış və müəyyən avadanlıqlar alınmışdır. Gələn il isə bundan daha çox abidənin pasportunun hazırlanması planlaşdırılır. Həmin pasportların yığcam şəkli internetdə - UNESCO-nun portalında, Avropa Şurasının xüsusi saytlarında yerləşdiriləcək ki, istənilən adam bu abidələr haqqında məlumat ala bilsin.
Abidələrin pasportlarında onlarla bağlı olan bütün məlumatlar - tarixi arayış, koordinatları, eskizləri əks olunacaqdır. Hazırda bunların hamısının elektron versiyası hazırlanır. Bundan sonra dünyanın istənilən nöqtəsində istənilən adam bu abidə haqqında məlumatları elektron yolla əldə edə biləcəkdir.
Bölmənin digər xəbərləri
