Cakartada təşkil olunan vebinarda Ermənistanın Azərbaycan şəhərlərinə raket hücumu kəskin şəkildə pislənilib
Cakarta, 12 oktyabr, AZƏRTAC
Cakartada İndoneziya İslam Əməkdaşlıq Təşkilatı Gənclər Təşkilatının (İndoneziya İƏT GT) təşəbbüsü və Azərbaycanın bu ölkədəki səfirliyinin dəstəyi ilə Ermənistan-Azərbaycan Dağlıq Qarabağ münaqişəsinə, xüsusilə son günlər Ermənistanın cəbhədə son təxribatlarına həsr olunmuş beynəlxalq vebinar keçirilib.
AZƏRTAC xəbər verir ki, tədbirin təşkilində əsas məqsəd İndoneziya ictimaiyyətini Ermənistan-Azərbaycan Dağlıq Qarabağ münaqişəsi barədə daha ətraflı məlumatlandırmaqdan və bu münaqişə zəminində hazırda cərəyan edən proseslərin daha geniş kütləyə çatdırılmasından ibarət olub.
Vebinarda İndoneziya İƏT Gənclər Təşkilatının baş katibi xanım Astrid Nadya Rizgita, İƏT Gənclər Forumunun sabiq vitse-prezidenti Tantan Taufiq Lubis, Azərbaycanın İndoneziyadakı səfirliyinin ikinci katibi İntiqam Hüseynov, Bakı Dövlət Universitetinin müəllim-doktorantı Sultan Zahidov və Kəşmir Gənclər Forumunun icraçı direktoru Əhməd Qureyşi əsas məruzəçi qismində çıxış ediblər.
Əvvəlcə İndoneziya İƏT Gənclər Təşkilatının prezidenti Şafi Əfəndinin Ermənistanın Azərbaycana qarşı son təxribatları ilə bağlı bəyanatı səsləndirilib.
Tədbiri giriş nitqi ilə açan İƏT Gənclər Forumunun sabiq vitse-prezidenti Tantan Taufiq Lubis sentyabrın 27-də Ermənistan silahlı qüvvələrinin Azərbaycana qarşı hərbi təxribatı, Azərbaycanın haqq işinin İndoneziya ictimaiyyətinə çatdırılması, eyni zamanda, erməni vandalizminin indoneziyalı rəsmilər tərəfindən qınanması istiqamətində təşkilatın əməli fəaliyyətini diqqətə çatdırıb. O, Ermənistan tərəfinin humanitar atəşkəs barədə razılaşmanı kobud şəkildə pozaraq, Azərbaycanın ikinci böyük şəhəri olan Gəncəni və digər şəhərləri raket zərbələrinə məruz qoyması nəticəsində həyatını itirənlərin və yaralananların olmasından təəssüf hissi keçirdiyini bildirib. Erməni vandalizminin İndoneziya ictimaiyyətinə çatdırılması məqsədilə zəruri tədbirlər görüldüyünü qeyd edib.
Dağlıq Qarabağın tarixi Azərbaycan ərazisi olduğunu vurğulayan İndoneziya İƏT Gənclər Təşkilatının baş katibi A.Rizgita İndoneziya hökumətinin bu münaqişəyə lazımı diqqət göstərməməsindən təəssüfləndiyini ifadə edib. O, Ermənistanın işğalçı dövlət olduğunu bəyan edərək, bu faktın BMT Təhlükəsizlik Şurasının 1993-cü ildə qəbul etdiyi müvafiq qətnamələri ilə də təsdiqləndiyini diqqətə çatdırıb. İndoneziyanın Ermənistan ilə diplomatik münasibətlərə malik olduğunu qeyd edən baş katib, ölkə rəhbərliyinin Azərbaycanın son addımlarının ərazi bütövlüyünü bərpa etmək üçün atdığını Ermənistan tərəfinə çatdırmalı olduğunu qeyd edib. A.Rizgita İndoneziya XİN-in “Twitter” üzərindən oktyabrın 1-də yaydığı bəyanata toxunaraq, bu xüsusda İndoneziya Prezidenti Coko Vidododan, Xarici İşlər naziri xanım Retno Marsudidən Azərbaycana daha açıq dəstək göstərmələrini xahiş edib. Ermənistan tərəfinin humanitar atəşkəsi pozaraq Gəncədə və digər şəhərlərdə yaşayan mülki şəxslərə qarşı hücumlarını pisləyən A.Rizgita İndoneziya ictimaiyyətinin buna layiqli hüquqi qiymət verməli olduğunu deyib.
Çıxış edən İntiqam Hüseynov Ermənistan-Azərbaycan Dağlıq Qarabağ münaqişəsinin siyasi və hüquqi aspektləri barəsində geniş məlumat verib. Ermənistanın baş naziri Nikol Paşinyanın və digər rəsmilərin son illərdə səsləndirdiyi absurd bəyanatlar, xüsusən Ermənistanın “yeni ərazilər üçün yeni müharibə” taktikası, iyul təxribatı və son olaraq sentyabrın 27-də Azərbaycana qarşı hücum cəhdi haqqında ətraflı danışıb. Hazırda baş verənlərin bütün məsuliyyətinin Ermənistanın hərbi və siyasi hakimiyyətinin üzərinə düşdüyünü diqqətə çatdırıb.
Bakı Dövlət Universitetinin müəllim-doktorantı Sultan Zahidov Ermənistan-Azərbaycan Dağlıq Qarabağ münaqişəsinin tarixi aspektləri, ermənilərin tarixi Azərbaycan torpaqlarına yerləşdirilməsi, münaqişəsinin sülh yolu ilə həlli istiqamətində aparılan danışıqların tarixi və mahiyyəti, eləcə də Ermənistan tərəfinin danışıqlar prosesində tutduğu qeyri-konstruktiv mövqe barədə təqdimatla çıxış edib.
Kəşmir Gənclər Forumunun icraçı direktoru Əhməd Qureyşi də öz növbəsində Qarabağ həqiqətlərinin dünya ictimaiyyətinə daha geniş şəkildə çatdırılmasının vacibliyini qeyd edib. Azərbaycan diplomatiyasının bu istiqamətdə apardığı uğurlu fəaliyyəti yaxından izlədiyini vurğulayıb. Pakistan dövlətinin və xalqının qardaş Azərbaycanın yanında olduğunu bəyan etməkdən məmnunluq duyduğunu bildirib. Natiq Ermənistanın humanitar atəşkəs razılaşmasına əməl etməyərək Azərbaycanın mülki yaşayış obyektlərini atəşə tutması nəticəsində həlak olan şəxslərin ailələrinə başsağlığı verdiyini, yaralananlara şəfa dilədiyini söyləyərək, bu addımın terrorçu mahiyyət daşıdığını və dünya ictimaiyyəti tərəfindən qınanmalı olduğunu bildirib.
Sonda tədbir iştirakçılarının mövzu üzrə sualları cavablandırılıb, eyni zamanda, #KarabakhiIsAzerbaijan və #WeStandWithAzerbaijan şüarları səsləndirilib. Bundan əlavə, sözləri və musiqisi T.Lubisə məxsus mahnı səsləndirilib.
Vüqar Ağayev
AZƏRTAC-ın xüsusi müxbiri
Cakarta
Bölmənin digər xəbərləri
