Cala Caballa: Azərbaycanın insan hüquqları sahəsində böyük tarixi təcrübəsi var
Qahirə, 21 oktyabr, Asya Hacızadə, AZƏRTAC Ənənəvi Bakı Beynəlxalq Humanitar Forumu əyani şəkildə göstərdi ki, Azərbaycanın insan hüquqları sahəsində böyük tarixi təcrübəsi, yüksək beynəlxalq statusu və böyük beynəlxalq nüfuzu var. Bu faktı dünyanın aparıcı ölkələrinin görkəmli nümayəndələrinin - müxtəlif sahələr üzrə ekspertlərin, siyasətçilərin, Nobel mükafatı laureatlarının və dünya şöhrətli alimlərin şəxsində iştirakçı ölkələrin sayı təsdiq edir.
Bu sözləri Misir Ərəb Respublikası nümayəndə heyətinin tərkibində Forumda iştirak edən, Misirin ən böyük media korporasiyalarından birinin rəhbəri, “Əl-Cümhuriyyə” nəşriyyat və yayım evinin başçısı Cala Caballa AZƏRTAC-ın xüsusi müxbirinə müsahibəsində söyləyib.
Misir media maqnatı bildirib: “Yüksək səviyyədə təşkil olunan belə mötəbər Forumun keçirilməsi, açılış mərasimində Azərbaycan Prezidenti İlham Əliyevin iştirak etməsi və onun çıxışı dövlətin birinci şəxsinin humanitar məsələlərə göstərdiyi diqqətin parlaq təsdiqi, habelə beynəlxalq sülhün və həmrəyliyin möhkəmlənməsinə sanballı töhfədir. Bununla bərabər, Bakı Beynəlxalq Humanitar Forumu sadəcə dialoq aparmaq, dünya miqyaslı humanitar məsələləri müzakirə etmək üçün məkan deyildir. O, həm də ölkələr arasında daha sıx əlaqələr yaratmaq üçün gözəl imkandır. Forumda beynəlxalq əməkdaşlıq sahəsində irəliləyişə nail olmağa nadir imkan yaradılır. Korporasiyamız ilə Azərbaycanın əsas milli agentliyi AZƏRTAC arasında uğurlu əməkdaşlığın qurulması faktı bunu əyani şəkildə təsdiq edir. Bu əməkdaşlığı daha irimiqyaslı qarşılıqlı fəaliyyətə doğru atılan ilk addım kimi qiymətləndirmək olar. Azərbaycan ilə Misir arasında əməkdaşlığın bir sıra digər istiqamətlərində, o cümlədən Süveyş kanalının inkişafı və digər layihələrlə bağlı da belə addımlar atıla bilər”.
C.Caballa xüsusi vurğulayıb ki, bu forumun hər il keçirilməsi faktının özü Azərbaycan rəhbərliyinin ona necə böyük əhəmiyyət verdiyini, ölkənin beynəlxalq əlaqələri genişləndirməkdə, iştirakçı ölkələrin isə Azərbaycan ilə daha sıx əlaqələr yaratmaqda maraqlı olduğunu göstərir. O deyib: “Heç şübhəsiz, bütün bunlar beynəlxalq sülhə və həmrəyliyə xidmət edir”.
Azərbaycanın siyasi və iqtisadi uğurlarını yüksək qiymətləndirdiyini vurğulayan media korporasiyanın rəhbəri bildirib: “Bu, ölkənizə ilk səfərim idi. Məndə belə təəssürat yarandı ki, Azərbaycan perspektivli, böyük ümidlər verən dövlətdir və heç şübhəsiz, yaxın illərdə “iqtisadi pələnglərdən birinə çevriləcək”. Azərbaycanın bütün sahələrdə sürətli yüksəlişini müşahidə edərək belə qənaətə gəlmək olar. Ölkədə baş verən böyük tərəqqini şəxsən gördüm: burada əsl tikinti bumu və bütün istiqamətlərdə inkişaf baş verir. Prezident İlham Əliyev dövlətin inkişafına, iqtisadiyyatının möhkəmlənməsinə və beynəlxalq əməkdaşlıq məsələlərinə xüsusi diqqət yetirir. Türkiyə və Yunanıstan ərazilərindən Avropaya çəkiləcək qaz kəmərinin tikintisi layihəsini və ilk növbədə Azərbaycan vətəndaşlarının maraqlarının təmin olunmasına yönələn digər irimiqyaslı beynəlxalq layihələri xatırlamaq kifayətdir”.
“Əl-Cümhuriyyə” ilə AZƏRTAC arasında gələcək əməkdaşlıq məsələlərinə toxunan Cala Caballa qeyd edib ki, AZƏRTAC-ın baş direktoru Aslan Aslanovla görüşdə hərtərəfli əməkdaşlıq məsələləri müzakirə edilib. O deyib: “Həmkarımla söhbətimiz çox məzmunlu oldu. Azərbaycan KİV-lərini peşəkarcasına təmsil edən, çox savadlı və istedadlı bir insan olan A.Aslanovla söhbət zamanı mən əsl əməkdaşlıq əzmi və istəyi hiss etdim. Bu da dörd gündəlik qəzeti, bir sıra həftəlik və aylıq nəşrləri, habelə elektron saytı əhatə edən, peyk telekanalı açmağı nəzərdə tutan korporasiyamızın köməyi ilə Misir qəzetlərində Azərbaycanın obyektiv mənzərəsinin yaradılmasına kömək edəcək. Beləliklə, əməkdaşlığımız sayəsində Misir və Azərbaycan ictimaiyyətinə ölkələrimiz haqqında obyektiv informasiya çatdırılacaq. Təbii ki, bu da Azərbaycanın və Misirin milli maraqlarına cavab verir. Qarşılıqlı fəaliyyətimizin əsas məqsədi də elə budur”.
Asya Hacızadə
AZƏRTAC-ın xüsusi müxbiri
Qahirə
Bölmənin digər xəbərləri
