Cəlilabadın üzüm bağlarında qış budama işləri yekunlaşmaq üzrədir VİDEO
Cəlilabad, 14 fevral, İsmayıl Cəfərli, AZƏRTAC
Cəlilabadın üzümçülük təsərrüfatlarında qış budaması davam etdirilir. Fermerlər bu il yeni tinglər hesabına 20 hektaradək əlavə üzüm bağları salıblar.
AZƏRTAC xəbər verir ki, Cəlilabadda üzüm bağlarında mühüm aqrotexniki tədbirlərdən biri olan budama işləri aparılır. Budama hər ağacın sortu, eləcə də, torpaq-iqlim şəraiti nəzərə alınaraq aparılır. Rayon ərazisində bu mühüm aqrotexniki tədbirə ötən ilin dekabr ayından start verilib və yaxın günlərdə başa çatacaq. Hazırda Cəlilabadda üzüm bağlarının ümumi sahəsi 1400 hektardan çoxdur.
Üzüm bağına qulluq edən Hüseyn Cəfərov bildirir ki, budamanın aparılması üzümçülükdə vacib amildir: “Hazırda qış budaması aparırıq. Qış suvarmasını isə bitirmişik. İnşallah iyun ayından yay suvarmasını edəcəyik. Bağları ildə iki dəfə suvarırıq. Yaxşı məhsul götürmək üçün bu işlərin görülməsi mütləqdir”.
Təsərrüfat sahibi, fermer Ramazan Əliyev isə deyir ki, köhnə budaqların təmizlənməsi mütləq həyata keçirilməlidir. “Budama aparanda diqqətli olmaq lazımdır. Köhnə budaqları təmizləməliyik ki, cavan budaqlar gəlsin. Bununla ağaclar cavanlaşır, ömrü uzanır. Əgər budama aparılmasa, üzüm ağacı tez qocalar. Hazırda bağımda 20 yaşında ağaclar var. Bu qulluq nəticəsində üzüm ağaclarının ömrü daha da uzanacaq”, - deyə o əlavə edir.
Üzümçülük və Şərabçılıq Elmi-Tədqiqat İnstitutunun nümayəndəsi Azad Əkbərovun sözlərinə görə, qida maddəsi ilə zəngin və rütubətlə yaxşı təmin olunan sahələrdə hər hektar üzümlükdə orta hesabla 220-250 min, digər ərazilərdə isə 160- 200 min gözcük saxlanmalıdır. Bu gözcüklər bar vaxtı çox yüksək və keyfiyyətli məhsulun alınmasını təmin edib.
Qeyd edək ki, rayonun üzüm bağlarında təxminən 20 məhsuldar sort becərilir. Ümumilikdə isə yerli üzüm sortları rayonda salınan bağların təxminən 15 faizini təşkil edir. Mütəxəssislərin sözlərinə görə, yaxın vaxtlarda müasir tingçilik təsərrüfatının fəaliyyətə başlaması ilə yerli üzüm sortlarının əkin sahələrinin iki dəfəyədək artırılması planlaşdırılır.
Bölmənin digər xəbərləri
