“CƏNUB” ELEKTRİK STANSİYASININ TƏMƏLİ QOYULMUŞDUR
 |
 |
 |
 |
Azərbaycan Prezidenti İlham Əliyev mərasimdə iştirak etmişdir.
Dövlətimizin başçısını və ailə üzvlərini energetiklər, inşaatçılar böyük hörmətlə qarşıladılar, onlara gül dəstələri təqdim olundu.
Stansiyanın ərazisinin girəcəyində xüsusi lövhə üzərinə “Azərbaycan Respublikasının Prezidenti zati-aliləri cənab İlham Əliyev “Cənub” elektrik stansiyasının təməl daşını 2007-ci il dekabrın 24-də qoymuşdur” sözləri yazılmışdı.
Prezident İlham Əliyev əvvəlcə stansiyanın ərazisini, habelə yaxınlıqda yerləşən Əli Bayramlı DRES-ini seyr etdi, yeni tikiləcək stansiyanın texniki göstəriciləri ilə tanış oldu.
“Azərenerji” Səhmdar Cəmiyyətinin sədri Etibar Pirverdiyev məlumat verdi ki, yeni tikiləcək stansiya qaz-buxar turbinləri, qaz kompressoru, inzibati bina, hovuz, avtodayanacaq, park, yanğınsöndürmə məntəqəsi, 220, 330 və 110 kilovoltluq yardımçı stansiyalar, su təmizləyici qurğu, su, mazut, dizel yanacağı çənləri, mazut emaledici qurğu, yağboşaltma nasos stansiyası, yüksəldici transformatorlar, sistem transformatoru və idarəetmə binasından ibarət olacaqdır. 780 meqavat gücündə olacaq bu stansiya 2009-cu ildə istifadəyə veriləcəkdir. Yerli “Azenko” şirkəti tərəfindən tikiləcək stansiya həm təbii qaz, həm də mazutla işləyə biləcəkdir. Stansiya ən müasir avadanlıqla təmin olunacaqdır. Qaz turbinləri Amerika, elektrik hissəsinin avadanlığı Fransa şirkətlərindən alınacaqdır. Ümumiyyətlə, burada 70-dən çox şirkətin avadanlıq və qurğuları quraşdırılacaq və ildə 1 milyard kubmetr təbii qaza qənaət etmək mümkün olacaqdır.
Təxminən 600 milyon avroya başa gələcək yeni stansiyanın inşasının respublikamızın energetika sistemi üçün böyük əhəmiyyəti var. Stansiya bölgənin elektrik enerjisinə olan tələbatının əsas hissəsini təmin edəcək, ölkəmizin energetika sisteminin dayanıqlığında mühüm rol oynayacaqdır. İnşaat işlərində 1500-dək insan çalışacaq, stansiya istismara veriləndən sonra 500-600 daimi iş yeri yaradılacaqdır.
Prezident İlham Əliyev tikintinin layihəsi ilə bağlı videofilmə baxdı.
Sonra dövlətimizin başçısı gilizi təmələ qoydu və beton qarışığı tökdü.
Prezident İLHAM ƏLİYEV energetikləri və inşaatçıları təbrik edərək dedi:
-Mən indi burada göstərilən videofilmdə bir daha gördüm ki, nə qədər böyük işlər aparılır. Ən vacibi odur ki, bu işləri Azərbaycan şirkətləri, mütəxəssisləri, inşaatçıları görürlər. Son illər ərzində Azərbaycanın müxtəlif bölgələrində bir neçə elektrik stansiyası tikilibdir. Modul tipli beş stansiya tikilibdir. Əlbəttə, onlarda da Azərbaycan inşaatçıları iştirak etmişlər, ancaq xarici mütəxəssislərlə birlikdə işləmişlər. “Cənub” elektrik stansiyası yüz faiz Azərbaycan mütəxəssisləri tərəfindən tikiləcəkdir. İndi bizim imkanımız var, potensialımız, maliyyə resurslarımız var, kredit almaq üçün geniş danışıqlar aparmaq lazım gəlmir. İstənilən məbləğdə kredit alırıq, öz pulumuzu qoyuruq və Əli Bayramlıda ən müasir standartlara cavab verən stansiya tikiləcəkdir. 780 meqavat gücündə olacaq elektrik stansiyası bizim iqtisadi potensialımızı xeyli dərəcədə gücləndirəcəkdir. Bu stansiya işə düşəndən sonra böyük qənaət olunacaqdır. Mövcud köhnə elektrik stansiyasının nə gündə olduğunu görürük, 460 qram şərti yanacaq yandırır. Yeni stansiya isə 240 qram şərti yanacaq yandıracaqdır. Bu nə deməkdir?! Biz ildə təxminən 1 milyard kubmetr qaza qənaət edəcəyik.
Stansiyanın tikintisi zamanı burada yüzlərlə insan çalışacaq, ondan sonra isə istismarı zamanı işləyəcəklər. Hamısı da Azərbaycan vətəndaşlarıdır. Pul Azərbaycanda qalacaq, Azərbaycan şirkətləri, vətəndaşları yüksək keyfiyyətlə işləyəcəklər. Bu onu göstərir ki, bizim potensialımız elədir ki, istənilən tikintini uğurla başa çatdıra bilərik. Burada düzülən bu texnika bir neçə il bundan əvvəl yox idi. Heç nə yox idi. İndi baxın, nə qədər texnika, avadanlıq alınıbdır.
İndi Sumqayıtda böyük elektrik stansiya tikilir, bu il istismara veriləcəkdir. Əli Bayramlıda, Səngəçalda - hər yerdə tikilir. Texnika da, peşəkar mütəxəssislər də, maliyyə vəsaitimiz də - hər cür imkanımız var. Biz bu gözəl stansiyanı yəqin ki, iki-üç ildən sonra burada birlikdə açacağıq.
Sizə də uğurlar arzulayıram. Burada yaxşı işləyin, keyfiyyətlə işləyin. Çünki bu, bizim ölkəmizin inkişafı üçün lazımdır. Sağ olun.
Bölmənin digər xəbərləri
