Cənub-Şərqi Asiya ölkələrində rekord istilər qeydə alınıb
Bakı, 8 may, AZƏRTAC
Vyetnamda ölkə tarixində ən yüksək temperatur - 44 dərəcə Selsidən yüksək temperatur qeydə alınıb. Ekspertlərin fikrincə, iqlim dəyişməsi səbəbindən bu rekord göstərici uzunmüddətli olmayacaq.
Rekord ölkənin şimal əyaləti olan Thanhaoda müəyyən edilib. AZƏRTAC BBC-yə istinadla xəbər verir ki, hakimiyyət orqanları əhalini belə isti günlərdə evdən çıxmamağa çağırıb.
Regionun başqa ölkələrində də həddən artıq isti hava müşahidə olunur. Tailandın hakimiyyət orqanları qərb əyalətində - Makda 44,6 dərəcə rekord temperatur barədə xəbər veriblər. Myanma KİV-lərinin məlumatına görə, ölkənin şərqindəki şəhərlərdən birində 43,8 dərəcə - son onillik ərzində ən isti temperatur müşahidə olunub. Musson mövsümündən əvvəl hər iki ölkədə istilər adi haldır, lakin bu dəfə temperatur rekord vurmaqda davam edir.
İqlim dəyişməsi üzrə vyetnamlı ekspert Nquyen Nqok Huey bildirib ki, iqlim dəyişməsi və qlobal istiləşmə kontekstində Vyetnamın yeni rekordu narahatlıq doğurur. Ekspert gözləyir ki, bu cür rekordlar burada hələ çox müşahidə olunacaq. “Bu, iqlim modellərinin nəticələrinin gerçəkliyini sübut edir”, - deyə alim bildirib.
Vyetnamda bundan əvvəlki rekord (43,4 dərəcə) dörd il öncə Ha Tin mərkəzi əyalətində qeydə alınmışdı.
İsti təkcə Cənub-Şərqi Asiya ölkələrində qeydə alınmayıb. Banqladeşin paytaxtı Dəkkədə 1960-cı ildən bəri ən yüksək temperatur qeydə alınıb, Hindistanın hakimiyyət orqanları isə ölkənin bəzi bölgələrində temperaturun normanı 3-4 dərəcə keçdiyini bəyan ediblər.
İspaniyanın cənubunda yerləşən Kordova hava limanında aprel ayı üçün ən yüksək temperatur qeydə alınıb - 38,8 dərəcə Selsi.
İqlimşünas alimlər mart ayında elan ediblər ki, bundan əvvəl bəyan edilən qlobal temperaturun azaldılması üzrə əsas hədəflərə çatmaq mümkün olmayacaq.
Sənaye dövrü başlanandan bəri dünya artıq təxminən 1,1 dərəcə istiləşib və əgər hökumətlər tullantıları kəskin azaltmasalar, o halda temperatur artmaqda davam edəcək.
Hökumətlər bundan əvvəl qlobal temperaturun azı 1,5 dərəcə artmasına yol verməmək üçün tədbirlər görmək barədə razılığa gəliblər. Lakin planet artıq 1,1 dərəcə istiləşib və indi ekspertlər bildirirlər ki, 2030-cu illərdə Yer kürəsinin orta temperaturunun artımı 1,5 dərəcəni üstələyə bilər.
Birləşmiş Millətlər Təşkilatının Hökumətlərarası ekspertlər qrupu bəyan edib ki, orta illik temperaturun hər artımı qlobal istiləşmənin mənfi nəticələrini gücləndirə bilər.
Bölmənin digər xəbərləri
