Çində bir ayda COVID-19 səbəbindən 60 minə yaxın ölüm halı qeydə alınıb
Bakı, 14 yanvar, AZƏRTAC
Çin hakimiyyəti dekabrın 8-dən yanvarın 12-dək ölkənin tibb müəssisələrində COVID-19-la bağlı 59 938 nəfərin öldüyünü müəyyənləşdirib.
AZƏRTAC xəbər verir ki, bu barədə şənbə günü rəsmi Çin mediası məlumat yayıb. Məlumata görə, onlardan 5,5 minə yaxını birbaşa koronavirusun yaratdığı tənəffüs problemləri səbəbindən həyatını itirib, təxminən 54 min nəfərdə isə COVID-19 digər xəstəliklərin yaratdığı problemləri daha da ağırlaşdırıb. Ölənlərin orta yaşı 80-ə yaxındır.
Eyni zamanda, çinli ekspertlər hesab edirlər ki, ölkədə virusun yayılmasının pik həddi arxada qalıb.
Çin 2020-ci ildən başlayaraq, COVID-19-a qarşı "sıfır dözümlülük" siyasəti yeridir və sərt karantin rejimi tətbiq edirdi. Lakin 2022-ci ilin dekabrında hakimiyyət virusun yayılmasının qarşısını almaq üçün qoyulmuş bir sıra məhdudiyyətləri aradan qaldırıb və bu, yoluxma və ölüm hallarının kəskin artmasına səbəb olub.
Bölmənin digər xəbərləri
