Bakı, 11 aprel, AZƏRTAC

Azərbaycanın dünya birliyindəki nüfuzu ildən-ilə artır, mövqeyi güclənir, əlaqələri daha da genişlənir. Bu gün ölkəmiz Cənubi Qafqazda lider, dünyada söz sahibinə çevrilib. 2020-ci il noyabrın 10- da Ermənistan üzərindəki tarixi Qələbəmizin rəsmiləşdirilməsindən sonra ölkəmizlə əməkdaşlıq etmək istəyən dövlətlərin sayı getdikcə artır. Ermənistanın 30 illik işğalçılıq siyasətinə 44 gün ərzində son qoyulması Azərbaycanın reytinqini daha da yüksəltdi. Müharibədən yenicə çıxmış bir ölkənin Qələbədən bir həftə sonra işğaldan azad edilmiş ərazilərimizdə dərhal yenidənqurma, tikinti-bərpa işlərinə başlaması Azərbaycanın həm də iqtisadi gücünün göstəricisidir. Bütün bu uğurlara Prezident, Ali Baş Komandan İlham Əliyevin düzgün müəyyənləşdirdiyi siyasi kurs sayəsində nail olmuşuq.

Bu fikirləri AZƏRTAC-a açıqlamasında Demokratiya və İnsan Hüquqları Komitəsinin sədri, hüquq üzrə fəlsəfə doktoru Çingiz Qənizadə bildirib.

Hüquq müdafiəçisi deyib ki, son 19 ildə Prezident İlham Əliyevin rəhbərliyi ilə həyata keçirilən daxili və xarici siyasət sayəsində Azərbaycanın adı dünyanın inkişaf etmiş dövlətləri ilə bir sırada çəkilir. Bu illər ərzində əhalinin rifahı yaxşılaşdırılmış, pensiyalar, əməkhaqları, sosial müavinət artırılmış, siyasi, iqtisadi, mədəni sahələrdə misli görünməmiş nailiyyətlər qazanılmışdır. Məhz bu uğurlara görə də 2018-ci il aprelin 11-də keçirilən prezident seçkilərində xalq yenidən Prezident İlham Əliyevə etimad göstərdi. Həmin seçkilərdən sonra dövlətimizin başçısı qarşıya qoyduğu vəzifələri açıqlayaraq demişdir: “Biz gələcəyə baxmalıyıq və baxırıq. Növbəti illərdə görüləcək işlər haqqında bizim çox aydın təsəvvürümüz, planlarımız, proqramlarımız var... Ona görə mən əminəm ki, bütün Azərbaycan xalqı və biz hamımız gələcəyə çox böyük nikbinliklə baxırıq. Hamımızın amalı ondan ibarətdir ki, ölkəmiz daha da güclənsin, daha da qüdrətli dövlətə çevrilsin, Azərbaycan vətəndaşları daha da yaxşı yaşasınlar”.

Komitə sədri həmin il növbədənkənar prezident seçkilərinin keçirilməsini şərtləndirən amillərdən söhbət açıb. Deyib ki, Azərbaycan ərazilərinin uzun illər boyu davam edən işğalına tezliklə son qoymaq üçün dövlətin daha da gücləndirilməsinə, ölkə daxilində islahatları sürətləndirərək çevik idarəetmənin qurulmasına, millətin hakimiyyətə etimadının bir daha sınaqdan çıxarılmasına, güvənməsinə əmin olmaqdan ötrü növbədənkənar seçkilərin keçirilməsi zəruri idi. Yaranmış mürəkkəb beynəlxalq şərait, müxtəlif dövlətlər arasında münasibətlərin gərginləşməsi çevik addımların atılmasını labüd etmişdir: “2018-ci il aprelin 11-də keçirilmiş növbədənkənar prezident seçkiləri Azərbaycan Respublikası Prezidenti postuna keçirilən sayca 8-ci rəsmi seçki olmuşdur. 2018-ci ilin seçki marafonunda 8 namizəd iştirak etmişdir. Seçkilərdə səsvermə hüququna malik olan vətəndaşların 74,3 faiz iştirak etmişdir. Şəffaf, azad, demokratik şəraitdə keçirilən seçkilərdə cənab İlham Əliyev Azərbaycan seçicilərinin mütləq əksəriyyətinin -86,02 faiz səsini qazanaraq, Azərbaycan Respublikasının Prezidenti seçilmişdir”.

Ç.Qənizadə prezident seçkilərindən sonra qazanılan uğurlardan söhbət açaraq deyib ki, dövlətimizin başçısı İlham Əliyevin prezidentliyi dövründə ölkəmiz böyük inkişaf yolu keçib, Azərbaycan dövlətçiliyinin əsasları ciddi şəkildə möhkəmlənib, dövlətimiz güclənib, onun qüdrəti və iqtisadiyyatı daha da artıb, Azərbaycanın beynəlxalq müstəvidə mövqeyi xeyli dərəcədə güclənib. İnsan amili, xalqın rifahı və milli maraqlar dövlət siyasətinin strateji prioritetləri olmuşlar. Xarici siyasətdə qazanılan uğurlar ölkənin beynəlxalq imicinin və tərəfdaş dövlətlərin sayının artırılmasında mühüm rol oynayıb. 2003-2018-ci illər ərzində Prezident İlham Əliyevin rəhbərliyi altında həyata keçirilən xarici siyasət və nəticəyə hesablanmış diplomatik uğurlar Azərbaycanın BMT, AŞ, ATƏT, NATO və bütün digər nüfuzlu beynəlxalq təşkilatların yüksək tribunasından daha qətiyyətlə çıxış etməsi və bir çox məsələlərdə beynəlxalq aləmin onun rəyinə hörmətlə yanaşması üçün münbit şərait yaratmışdır.

Komitə sədri deyib ki, 2018-ci ildə keçirilmiş seçkilərin nəticələri bir daha göstərdi ki, radikalların Azərbaycanın siyasi səhnəsində yeri yoxdur. Xarici qrant, ianə hesabına fəaliyyət göstərən, öz dövlətinə qarşı çıxış edən, bir çox hallarda milli satqınlıq nümayiş etdirən ünsürlərə Azərbaycan xalqı bir daha öz yerini göstərdi. Bu seçkilərdə Azərbaycan xalqı Prezident İlham Əliyevə səs verməklə ölkədə aparılan demokratik islahatlara səs vermiş oldu. Demokratik institutların inkişafı ilə bağlı siyasət davamlı olaraq reallaşdırılır. Siyasi müstəqillik sayəsində Azərbaycan xalqı öz taleyinin sahibidir. Ölkədə başlayan genişmiqyaslı islahatlar bütün sahələri əhatə etdi. Xalq öz Prezidentinə inandı və ətrafında sıx birləşdi. Bu həmrəylik və birlik - 44 günlük Vətən müharibəsində özünü daha açıq şəkildə büruzə verdi.

Tarixi Qələbəmizdən söhbət açan Ç.Qənizadə deyib ki, Azərbaycan Ordusu Müzəffər Ali Baş Komandanın rəhbərliyi ilə ölkənin ərazi bütövlüyünü, tarixi ədaləti, beynəlxalq hüququ bərpa etmişdir. Ermənistanın Azərbaycana qarşı təcavüzünün qarşısını almaq məqsədilə sentyabrın 27-də bütün cəbhəboyu əks-hücuma keçən Azərbaycan Ordusu 1990-cı illərin əvvəlində baş verən Birinci Qarabağ müharibəsi zamanı Ermənistan tərəfindən işğal edilmiş əraziləri işğaldan azad etməyə başladı. 44 gün davam edən Vətən müharibəsi şanlı Qələbəmizlə başa çatdı: “Bu gün Azərbaycan bütün sahələr üzrə dünyanın inkişaf etmiş dövlətləri ilə bir sıradadır. Prezident İlham Əliyev milli ideya ətrafında xalqı birləşdirib. Ölkəmizdə azərbaycançılıq məfkurəsi tam bərqərar olub. Bu gün Azərbaycanda dövlət idarəçiliyi və respublikamızın müdafiəsi etibarlı əllərdədir”- deyə Ç.Qənizadə bildirib.