Polis əməkdaşlarının etik-davranış qaydalarına əməl edilməsi ilə bağlı mütəmadi təlimlər keçirilir

Bakı, 14 iyul, AZƏRTAC

Prezident İlham Əliyevin sədrliyi ilə 2023-cü ilin altı ayının sosial-iqtisadi yekunlarına həsr olunmuş müşavirədə toxunulan mövzulardan biri də Gədəbəyin Söyüdlü kəndində baş verən hadisələr oldu. Həmin təxribat xarakterli hadisələr zamanı Azərbaycan polisini ləkələməyə çalışan qüvvələrə dövlətimizin başçısı tərəfindən sərt mesaj da göndərildi. Prezident müşavirədə çıxış edərək deyib: “Heç kim, necə deyərlər, fikirləşməsin ki, biz bunu unutmuşuq. Azərbaycanda xaos, özbaşınalıq, təxribat xarakterli addımlar 1993-cü ildə başa çatıb. Əgər kimsə unudubsa, biz xatırlada bilərik. Ona görə vətəndaşlar da həm mədəniyyət göstərməlidirlər, necə deyərlər, mərifət göstərməlidirlər, qanuna tabe olmalıdırlar, polisə daş atmamalıdırlar, polisə daş atmaq heç kimə şərəf gətirən hərəkət deyil. Bu, birincisi. İkincisi, bu, cinayətdir. Əgər Azərbaycan polisi dözümlülük göstərirsə, o demək deyil ki, kim istəyir polisə daş ata bilər. Bu, qətiyyən mümkün deyil. Mən hər kəsə deyirəm, burada biz kiminsə nazı ilə oynayası deyilik, necə lazımdır, əgər lazım bilsək, kimi lazımdır, elə cəzalandırarıq ki, peşman olar”.

Dövlətin əsaslarına yönələn təhdidlərin qarşısının alınmasında Azərbaycan polisinin xüsusi rolu var

Daxili İşlər Nazirliyi yanında İctimai Şuranın sədri Əliməmməd Nuriyev AZƏRTAC-a müsahibəsində bu yaxınlarda 105 illiyini qeyd edən Azərbaycan polisinin çevikliyi, ayıq-sayıqlığı nəticəsində ictimai asayişin necə qorunması, cinayətkarlıqla uğurlu mübarizədən bəhs edib.

O bildirib ki, hazırda cinayətkarlığa qarşı mübarizədə informasiya-kommunikasiya texnologiyalarının imkanlarından geniş istifadə edilir: “Adətən bunlar internet, sosial şəbəkələr üzrə aşkar edilir. Azərbaycan polisinin çevikliyi, peşəkarlığı sayəsində terrorçular operativ şəkildə aşkarlanaraq zərərsizləşdirilir. Son vaxtlar ayrı-ayrı dövlətlərin xüsusi xidmət orqanları Azərbaycanda təxribat törətməyə, qanunsuz hərəkətlər, aksiyalar təşkil etməyə cəhd edir. Məhz dövlətin əsaslarına yönələn təhdidlərin qarşısının alınmasında Azərbaycan polisinin xüsusi rolu var”.

İctimai Şuranın sədri deyib ki, polis əməkdaşları cinayətkarlığa qarşı daha səmərəli və operativ mübarizə aparır, vətəndaşların hüquq və azadlıqlarının qorunması üçün çox mühüm əhəmiyyət kəsb edən dövləti vəzifələri şərəflə, ləyaqətlə və peşəkarlıqla yerinə yetirir. Eyni zamanda, polisin fəaliyyətinə qarşı tələblər var. Çünki polis bu gün öz fəaliyyətini şəffaflıq, vətəndaşların məmnunluğu üzərində qurub. Hazırda onun şəffaflıq reytinqi xeyli dərəcədə artıb. Eyni zamanda, əgər polis əməkdaşlarının qanunsuz hərəkətləri olursa, dərhal reaksiya verilir. Yəni bir tərəfdən polis əməkdaşlarının peşəkarlığı yüksəlir, digər yandan cavabdehlik, öz əməkdaşlarına münasibətdə məsuliyyət tələbləri artır. Çünki onların başlıca vəzifəsi vətəndaş məmnunluğunun təmin edilməsi, onun hüquq və azadlıqlarının, qanunu mənafelərinin qorunmasıdır. Hər bir şəxsin qanuni mənafeyinin, hüquq və azadlıqlarının etibarlı təminatı üçün davamlı tədbirlər həyata keçirilir.

Polisin peşəkarlığının yüksəldilməsi istiqamətində sistemli tədbirlər görülür

Qeyd olunub ki, polisin peşəkarlığının yeni keyfiyyət səviyyəsinə yüksəldilməsi istiqamətində sistemli tədbirlər görülür. Bütün peşə tələblərinə cavab verən xüsusi qurum - Təlim Mərkəzi yaradılıb. Şəxsi heyət planlı şəkildə həmin Mərkəzdə və Polis Akademiyasında ixtisasartırma və yenidən hazırlıq kurslarına cəlb olunur. Polis kadrların hazırlanmasına xüsusi diqqət göstərilir. Polis orqanlarına işə götürülmə prosesi yüksək səviyyədə qurulub. Eyni zamanda, polis rəhbərliyində mütəmadi olaraq yeni kadrların gəlməsi, müasir texnologiyaların tətbiqi, mütərəqqi təcrübənin öyrənilməsi istiqamətində fəaliyyətlər həyata keçirilir.

Eyni zamanda, 44 günlük Vətən müharibəsində polisin müxtəlif nümayəndələrinin göstərdiyi qəhrəmanlıqları danmaq olmaz. Polis Azərbaycan xalqının tərkib hissəsidir və ictimai sabitliyin qorunması istiqamətində onun xidmətləri danılmazdır.

Bu gün yeni yanaşmalarından biri də odur ki, polis orqanları vətəndaş, cəmiyyət, mətbuatla çox yüksək səviyyədə əlaqələr yaradıb və əlaqələrin genişləndirilməsi istiqamətində addımlar atıb. Sosial şəbəkələr vasitəsilə əks - əlaqə yüksək səviyyədə qurulub. Bu, polis orqanlarında şəffaflığın göstəricisidir. Digər yandan Daxili İşlər Nazirliyi yanında İctimai Şura yaradılıb. Ümumiyyətlə, polis fəaliyyətində bütün istiqamətlər şəffaflaşdırılır. Polis əməkdaşlarının peşəkarlığın artırılması, etik-davranış qaydalarına əməl edilməsi ilə bağlı mütəmadi təlimlər təşkil olunur.

Hazırkı təhlükəsizlik mühiti həm də polisin gözəgörünməz, önləyici fəaliyyətinin nəticəsidir

“Həmçinin polisin infrastrukturun gücləndirilməsi istiqamətində də addımlar atılır. Mütəmadi struktur dəyişikləri baş verir. Azərbaycan Polisi Günü ərəfəsində DİN-in Kibercinayətkarlıqla Mübarizə Mərkəzinin yeni inzibati binası istifadəyə verildi. Kibercinayətkarlıq hazırkı şəraitdə ən mühüm təhdidlərdən biridir, bütövlükdə dünyada cinayətkarlıqla mübarizədə ən mühüm təhdidlərdən sayılır. Yeni mərkəz kibercinayətlərə qarşı əks tədbirlərin gücləndirilməsi, sistemli aparılması, vətəndaş məmnunluğunun təmin edilməsi üzrə fəaliyyətin beynəlxalq standartlara cavab verən iş şəraitində həyata keçirilməsi məqsədilə yaradılıb. Bu sahədə müvafiq strukturun formalaşdırılması cinayət hadisələrinin açılmasını daha da sürətləndirəcək”, - deyə İctimai Şuranın sədri bildirib.

Diqqətə çatdırılıb ki, hazırda Azərbaycanın bir çox şəhərləri təhlükəsizlik şəhər konsepsiyasına uyğun olaraq törədilmiş istənilən cinayətin və qanun pozuntularının qısa müddətdə operativ açılmasına mühüm töhfə verir. Bu baxımdan, Azərbaycan polisinin 105 illik inkişaf tarixinə nəzər salsaq, onun böyük nailiyyətlər qazanmasını görərik: "Hər hansı təhlükə hiss etdiyimiz zaman dərhal müraciət etdiyimiz ünvan Azərbaycan polisidir. Təhlükə ilə üzləşən insanların köməyinə çatan, həyatını düşünmədən riskə atan polis əməkdaşlarının sayı yüzlərlədir. Hər bir Azərbaycan vətəndaşı anlamalıdır ki, hazırkı təhlükəsizlik mühiti həm də polisin gözəgörünməz, önləyici fəaliyyətinin nəticəsidir".

Azərbaycan polisinin ölkədə sabitliyin qorunmasında rolu danılmazdır. Təhlükə hiss edərkən, çətinliyə düşərkən dost-tanışdan daha çox 102 xidmətinə zəng edirik. Polisin operativ və yorulmaz fəaliyyəti nəticəsində dəfələrlə təhlükədən sovuşub ürək rahatlığı ilə həyatımıza davam etmişik. Odur ki, öz vəzifə borclarını yerinə yetirən polisimizə qarşı olmaq yerinə, onlarla həmrəy olub asayişin qorunmasında pay sahibi olaq. Sonda fikirlərimizi dövlət başçısının müşavirədəki çıxışından bir hissə ilə tamamlamaq yerinə düşər:

“Bizim polis gecə-gündüz soyuqda, istidə, dağda asayişi qoruyur. Bizim Daxili Qoşunlarımız Qarabağda müharibə zamanı şəhid verib. İndi kimsə gəlsin, polisə ləkə vursun. Mən buna imkan verməyəcəyəm və hər kəs bunu bilsin - təxribatçılar, o təxribatlara uyanlar və bütün ictimaiyyət”.