Daha bir ünvanda tullantıların qalaqlanması və yandırılması faktı aşkar edilib
Bakı, 29 avqust, AZƏRTAC
Ekologiya və Təbii Sərvətlər Nazirliyinin “Qaynar xətti”nə Zığ şosesi 1 ünvanında tullantıların qalaqlanması və yandırılması ilə bağlı daxil olan şikayət nazirliyin əməkdaşları tərəfindən yerində araşdırılıb.
Nazirliyin mətbuat xidmətindən AZƏRTAC-a bildirilib ki, əraziyə keçirilən baxış zamanı bərk mənşəli müxtəlif tərkibli tullantıların qanunvericiliyə uyğun qaydada idarə olunmadığı və qalaqlanaraq yandırıldığı məlum olub.
Faktla bağlı həmin ərazidə tullantıların idarə olunmasına cavabdeh olan 1 saylı Xüsusi Təyinatlı Mənzil Kommunal Təsərrüfat Birliyinin 135 saylı Mənzil Kommunal İstismar Sahəsinin rəisi Sahib Quliyev barəsində protokol tərtib olunub və o, vəzifəli şəxs qismində inzibati qaydada 2000 manat məbləğində cərimə edilib.
Yol verilmiş qanun pozuntusunun aradan qaldırılması, ərazinin tullantılardan təmizlənməsi və gələcəkdə belə hallara yol verilməməsi üçün S.Quliyevə icrası məcburi olan müddətli “məcburi göstəriş” verilib.
Bölmənin digər xəbərləri
