İDMAN
DAHA İKİ BOKSÇUMUZ OLİMPİADADA MÜBARİZƏNİ DAYANDIRDI
69 kiloqram çəki dərəcəsində çıxış edən idmançımızın rəqibi Kuba boksçusu, ikiqat dünya çempionu Lorenso Araqon Armenteros idi.
Çox gərgin keçən döyüşün ilk iki raundu 4:2 və 6:3 hesabı ilə Kuba idmançısının xeyrinə başa çatdı. Üçüncü raund isə heç-heçə (4:4) nəticələndi. Həlledici – dördüncü raund Ruslan Xairovun üstünlüyü ilə keçsə də, yekun nəticəyə görə Kuba boksçusu iki xal fərqlə - 16:14 hesabı ilə qalib gəldi.
Beləliklə, R.Xairov Afina Olimpiadasında da yarımfinala çıxa bilmədi.
X X X
Həmin gün 1/4 final görüşündə çıxış edən ikinci idmançımız – Vüqar Ələkbərov da müvəffəqiyyətsizliyə uğradı.
90 kiloqram çəki dərəcəsində mübarizə aparan idmançımız rəqibinə, Suriya boksçusu Nasir əl-Şamiyə ciddi müqavimət göstərə bilmədi. Döyüşün başlanğıcı Vüqarın üstünlüyü ilə keçsə də, o, tədricən təşəbbüsü əldən verdi. Üçüncü və dördüncü raundları daha yüksək səviyyədə keçirən Suriya idmançısı 31:25 hesabı ilə qalib gəldi.
Vüqar Ələkbərovun çıxış etdiyi yeni çəki dərəcəsinə alışmadığı açıq-aşkar hiss olunurdu.
Bölmənin digər xəbərləri
