Daşkənddə Xocalı faciəsi qurbanlarının xatirəsi anılacaq
Daşkənd, 8 fevral (AZƏRTAC). Fevralın 25-də Azərbaycanın Özbəkistandakı səfirliyi Heydər Əliyev adına Azərbaycan Mədəniyyət Mərkəzində Xocalı faciəsinin 19-cu ildönümü ilə əlaqədar anma mərasimi keçirəcəkdir.
Tədbirdə Daşkənddəki Türkiyə səfirliyinin əməkdaşları, qardaş özbək xalqının nümayəndələri, paytaxtdakı diasporumuzun üzvləri, jurnalistlər də iştirak edəcəklər.
Artıq Özbəkistanın dövlət qurumları və ictimai təşkilatlarına, Daşkənddəki səfirliklərə, beynəlxalq təşkilatların nümayəndəliklərinə Xocalı faciəsi haqqında həqiqətləri əks etdirən, habelə bu soyqırımının beynəlxalq hüququn normalarına zidd olmasını sübut edən materiallar toplusu, erməni terrorizmini, ermənilərin Azərbaycana qarşı əsassız ərazi iddialarını ifşa edən kitablar, broşür və bukletlər göndərilir.
Tədbirdə Heydər Əliyev Fondunun vitse-prezidenti Leyla Əliyevanın təşəbbüsü ilə elan edilmiş “Xocalıya ədalət” kampaniyasının gedişi, eləcə də “Xocalı faciəsi”, “Xocalı faciəsi dünyanın KİV-lərində” və “Xocalı faciəsi uşaqların gözü ilə” mövzularında stendlər də nümayiş etdiriləcəkdir.
“Xocalı faciəsi elmi-kütləvi nəşrlərdə” sərgisində isə Ermənistan-Azərbaycan, Dağlıq Qarabağ münaqişəsi, Xocalı faciəsi ilə bağlı müxtəlif dillərdə çap olunmuş kitab və broşürlər göstəriləcəkdir.
Qulu Kəngərli
AZƏRTAC-ın xüsusi müxbiri
Daşkənd
Bölmənin digər xəbərləri
