DAXİLİ İŞLƏR NAZİRLİYİNDƏ AZƏRBAYCANIN ÜMUMMİLLİ LİDERİ HEYDƏR ƏLİYEVİN BÜSTÜNÜN AÇILIŞI OLMUŞDUR
Daxili işlər naziri general-polkovnik Ramil Usubov mərasimi açıq elan edərək, büstün üzərindəki ağ örtüyü götürdü.
Azərbaycanın dövlət himni səsləndi.
Büstün müəllifi xalq rəssamı, Milli Elmlər Akademiyasının həqiqi üzvü Ömər Eldarovdur. Mərasimdə çıxış edən sabiq daxili işlər naziri, uzun müddət ulu öndərimizin silahdaşı olmuş, istefada olan general, hazırda İqtisad Məhkəməsinin sədri işləyən Cəfər Vəliyev dünyanın siyasət korifeylərindən olan Heydər Əliyevin istər sovet dövründəki, istərsə də müstəqillik illərindəki siyasi fəaliyyətindən danışaraq dedi ki, o, təkcə bir regionun yox, həm də bəşəriyyətin inkişafına təsir göstərə bilən, yüksək mənəvi dəyərlərə, böyük siyasi mədəniyyətə malik, Azərbaycan vətəndaşlarını ümumi məqsəd və dəyərlər ətrafında birləşdirməyi bacaran qüdrətli ümummilli lider olmuşdur. O, Heydər Əliyev haqqında xatirələrini bölüşdü, dahi şəxsiyyətin zəngin dövlət idarəçiliyi təcrübəsindən, hüquq mühafizə orqanlarının inkişafına göstərdiyi xidmətlərdən söz açdı, zəngin həyat təcrübəsi ilə ölkəni vətəndaş müharibəsindən, dövlət çevrilişi cəhdlərindən qurtaran, xilaskarlıq missiyasına son nəfəsinədək sadiq qalan Heydər Əliyevin əziz xatirəsinin daim ürəklərdə yaşayacağını vurğuladı.
Daxili işlər orqanlarının gənc əməkdaşları adından çıxış edən Daxili Qoşunların hərbi qulluqçusu, leytenant Telman Həsənov bildirdi ki, Silahlı Qüvvələrimiz, Daxili İşlər Nazirliyi Daxili Qoşunlarının şəxsi heyəti Azərbaycanın tərəqqisi, xalqımızın xoşbəxt gələcəyi, daxili sabitliyin etibarlı mühafizəsi, torpaqlarımızın ərazi bütövlüyünün təmin olunması naminə bütün qüvvə və bacarığını səfərbər edəcək, dövlətimiz və dövlətçiliyimiz naminə Ali baş komandanın bütün əmr və göstərişlərini yerinə yetirməyə hər an hazır olacaq, böyük öndərimiz Heydər Əliyevin müqəddəs ideallarına sadiq qalacaqdır.
Daxili işlər naziri general-polkovnik Ramil Usubov çıxışında, milli tərəqqi və yüksəliş naminə xeyirxah və fədakar əməlləri, müstəqilliyimizin və dövlətçiliyimizin möhkəmləndirilməsi və inkişafında əvəzsiz xidmətləri ilə bütün dünya azərbaycanlılarının qəlbində özünə möhtəşəm abidə ucaltmış ümummilli liderimiz Heydər Əliyevin “Tarix, insanlar həmişə quranları, yaradanları qiymətləndirir” müdrik kəlamını xatırlatdı.
Nazir türk dünyasının böyük oğlunun ikinci dəfə hakimiyyətə qayıdışından sonra gördüyü nəhəng işlərdən danışaraq dedi ki, bu gün Azərbaycanın müstəqil dövlət kimi dünyanın siyasi səhnəsində möhkəmlənməsi, regionun aparıcı ölkələrindən birinə çevrilməsi, planetin ən qüdrətli dövlətlərinin strateji tərəfdaşı olaraq özünü təsdiqləyə bilməsi, beynəlxalq əhəmiyyətli qlobal layihələrin həyata keçirilməsi məhz Heydər Əliyevin uğurlu xarici siyasət xəttinin məntiqi yekunudur. O, ölkəyə rəhbərlik etdiyi illərdə daxili işlər orqanlarının da inkişafına, Daxili Qoşunlarda zəruri hərbi quruculuq işlərinin aparılmasına daim xüsusi diqqət, qayğı və tələbkarlıq göstərmişdir. R.Usubov vurğuladı ki, İlham Əliyevin prezident seçkilərində parlaq qələbəsi də məhz xalqımızın Heydər Əliyev siyasi xəttinə inam və sədaqətinin ifadəsi, Azərbaycanın gələcək tərəqqisinin və inkişafının təminatıdır.
Nazir Prezident, Ali baş komandan İlham Əliyevi və xalqımızı əmin etdi ki, daxili işlər orqanlarının bütün şəxsi heyəti ümummilli liderimiz Heydər Əliyevin amallarına daim sədaqətli olacaq, üzərlərinə düşən vəzifələri dövlətçilik, milli mənafe baxımından yüksək səviyyədə yerinə yetirmək üçün qüvvə və bacarığını əsirgəməyəcəkdir.
Sonra mərasim iştirakçıları nazirlikdə yeni yaradılmış tarix muzeyi ilə yaxından tanış oldular. Muzey, əsasən, ümummilli liderimizin həyat və fəaliyyəti və onun Azərbaycanın hüquq mühafizə orqanları ilə əlaqələri, daxili işlər orqanlarının fəaliyyətinə rəhbərliyi və onlara göstərdiyi diqqəti əks etdirir.
Bölmənin digər xəbərləri
