Deputat: Ermənistan regionda Qərbin kəşfiyyat mərkəzinə çevrilir
Bakı, 11 sentyabr, AZƏRTAC
Azərbaycan tərəfi dəfələrlə Ermənistanın regiona sülh deyil, dağıntı, fəlakət gətirən siyasət yürütdüyünü bəyan edib. Biz dünya birliyinə, o cümlədən yaxın və uzaq qonşularımıza bu siyasətin hansı mənfi fəsadlar törədə biləcəyi barədə də narahatlığımızı çatdırmışıq. Görünən odur ki, artıq bəzi ölkələr Ermənistanın hansı çirkin oyunlar oynadığının, necə təhlükəli bir siyasət həyata keçirdiyinin fərqindədirlər.
Bunu AZƏRTAC-a açıqlamasında Milli Məclisin deputatı Vüqar İskəndərov deyib.
Onun sözlərinə görə, general-mayor Məhəmməd Əhədinin rəhbərlik etdiyi İran Silahlı Qüvvələrinin nümayəndə heyətinin Azərbaycana səfəri fonunda cərəyan edən proseslər belə deməyə əsas verir ki, Tehranda artıq Ermənistanın yürütdüyü siyasətin İran üçün necə təhlükəyə çevrildiyinin fərqindədirlər. Çünki Ermənistan artıq ABŞ və Qərbin İrana qarşı bazasına və kəşfiyyat məntəqəsinə çevrilir. Avropa İttifaqı və NATO ölkələrinin nümayəndələrinin “müşahidəçi” adı ilə regiona gətirilməsi və İranla sərhəddə yerləşdirilməsi, Ermənistanın ABŞ ilə hərbi təlimləri - bütün bunlar birbaşa İrana qarşı təhdiddir.
İran Prezidenti ilə Ermənistanın baş naziri arasında telefon danışığının detallarına dair son paylaşım da necə deyərlər, İrəvanın “Qərbi İran sərhədinə gətirməsi”ndən rəsmi Tehranın ciddi narahat olduğuna işarə edir. Sözügedən telefon danışığının detallarını açıqlayan İranın vitse-prezidenti Məhəmməd Cəmşidi tviterdə paylaşımında “Cənubi Qafqazda “3+3” (Azərbaycan, Ermənistan, Gürcüstan, Türkiyə, Rusiya və İran) formatından kənar ünsiyyət qurmaq vəziyyəti daha da çətinləşdirir”, - deyə vurğulayıb. M.Cəmşidinin sözlərinə görə, əcnəbilərlə əməkdaşlıq etmək, onlarla hərbi təlimlər keçirmək və şübhəli səfərlər təşkil etmək vəziyyəti daha da mürəkkəbləşdirir. Əslində bu, Ermənistanın Qərbi regiona gətirmək cəhdi, ABŞ ilə hərbi təlimlər keçirməsi, Anna Akopyanın Ukraynaya səfəri ilə bağlı İranın açıq şəkildə narazılıq bildirməsidir.
“Son hadisələr Ermənistan rəhbərliyinin reallaşdırdığı siyasətin bir daha ifşa olunması anlamına gəlir. Nikol Paşinyan “mürəkkəb gedişlər” edərək hamını aldada biləcəyini düşünür. Ermənistan regionda açıq şəkildə Qərbin kəşfiyyat mərkəzinə çevrilir. Paşinyan rejimi Rusiya qoşunlarının Ermənistandan çıxarılmasına çalışır, NATO və Aİ-ni bölgəyə gətirmək istəyir, ABŞ ilə hərbi təlimlər keçirir, Rusiya rəsmilərinin ünvanına açıq təhqirlər səsləndirir və sair. Amma paralel olaraq İrandan və Rusiyadan da dəstək istəyir. Lakin bu oyunlar artıq tamamilə ifşa olunub. Hər halda Ermənistan səfirinin ilk dəfə olaraq Rusiya Xarici İşlər Nazirliyinə (XİN) çağırılaraq nota verilməsi, İran Prezidentinin Paşinyanla telefon danışığında “əcnəbilərlə təlimlər”, “şübhəli səfərlər” barədə dedikləri də bunu bir daha sübut edir. Digər tərəfdən, bir məqam üzərində xüsusi dayanmağı vacib bilirəm. Söhbət İran Prezidentinin qeyd etdiyi 3+3 formatından gedir. Məlumat üçün bildirim ki, 3+3 formatı Azərbaycan Prezidenti İlham Əliyev tərəfindən irəli sürülmüş və Türkiyənin də dəstək verdiyi təşəbbüsdür. Tezliklə bu təşəbbüs çərçivəsində XİN başçıları səviyyəsində görüşün keçiriləcəyi gözlənilir, bundan sonra daha yüksək səviyyədə də görüşlər ola bilər. İran Prezidentinin bu formatı xatırlatması Ermənistanın regiondankənar qüvvələri bölgəyə gətirmək cəhdinə reaksiyadır”, - deyə deputat vurğulayıb.
Bölmənin digər xəbərləri
