Deputat: Ermənistan sülh üçün yaranmış imkanları əldən verməklə yalnız özünə ziyan vurur
Bakı, 14 avqust, AZƏRTAC
Bölgədə yaranmış yeni geosiyasi durumla barışmaq istəməyən rəsmi İrəvan təxribatlarına davam edir. Ermənistan bu addımlarla, necə deyərlər, öz “ipini” kəsir. Son günlərdə baş verən təxribatlar, o cümlədən Laçın istiqamətinə toplanan ağır texnikalar, habelə “TIR şou”su bölgədə vəziyyəti gərginləşdirməkdən başqa bir amala xidmət etmir. Biz noyabr sazişinin 4-cü bəndinin, yəni Rusiya sülhməramlılarının müvəqqəti yerləşdirildiyi ərazilərimizdə erməni silahlılarının çıxarılmasını tələb edirik. Bu vəziyyət atəşkəs üçün də təhlükəlidir. İstənilən an oradakı silahlılar təxribatlar törədə bilərlər.
Bu fikirləri AZƏRTAC-a açıqlamasında Milli Məclisin deputatı Aydın Hüseynov səsləndirib.
Ermənistanın Rusiya sülhməramlılarının nəzarəti ilə Xankəndi və ətraf ərazilərdəki silahlılar üçün təminat gətirdiyindən təəssüflədiyini bildirən A.Hüseynov deyib: “Onlar bununla mövqelərini gücləndirməyə cəhd edirlər. Təbii ki, bu addımlar və eləcə də Kəlbəcər, Laçın istiqamətində təxribatların törədilməsi vəziyyəti gərginləşdirmək istəyən qüvvələrin sifarişidir. Bura həm İrəvandakı, həm də bəzi beynəlxalq güclər daxildir. Azərbaycan Ermənistanla sülh bağlamaq üçün bütün humanitar addımları atır, üstəlik Qarabağdakı ermənilərlə də danışıqlara razılıq verildi. Nəticə məlumdur. Həm Beynəlxalq Qırmızı Xaç Komitəsi (BQXK), həm də Rusiya Sülhməramlı Kontingenti vasitəsilə, humanitar yüklərin Ağdam-Xankəndi yolundan istifadə etməklə daşınmasına razı idilər. Ermənistan tərəfi isə qoyulmuş beton və bütün digər fiziki maneələri qaldırmalı idi, amma bu baş vermədi. Ermənilər etibarsız tərəf olduqlarını, sülh istəmədiklərini bir daha sübut etdilər”.
Deputat bildirib ki, digər məsələ Azərbaycanın xüsusi nümayəndəsi və yerli erməni sakinlərinin nümayəndələri arasında Yevlaxda görüşün keçirilməsi barədə razılıq əldə olunması ilə bağlıdır. Ermənistan öz separatçı rejimi vasitəsilə qeyri-qanuni şərtlər və bəhanələr irəli sürərək əldə olunmuş hər iki razılıqdan son anda boyun qaçırdı. Bu da onu göstərir ki, danışıqlardan imtina Qarabağa yüklərin daşınması problemini də uzadır.
Problemin uzadılmasında səbəbkarın İrəvan və onun Xankəndidə dəstəklədiyi separatçı qurum olduğunu vurğulayan A.Hüseynovun sözlərinə görə, bu addım bir daha onu göstərir ki, Ermənistan Azərbaycana qarşı ərazi iddialarına son qoymayıb və onun Azərbaycanın ərazi bütövlüyünü şifahi olaraq tanıması yerdəki əməllərindən fərqlənir.
“Dəfələrlə beynəlxalq hüquqa sadiqliyini bəyan etmiş Azərbaycan bu dəfə də beynəlxalq ictimaiyyətdən törədilən təxribatlara qarşı adekvat addımların atılmasını istəyir. Çünki yaranmış vəziyyət Ermənistan və Azərbaycan arasında dövlətlərarası münasibətlərin normallaşmasını və Qarabağdakı ermənilərin reinteqrasiyası prosesini ləngidir. İrəvanın “humanitar fəlakət” və “blokada” iddiaları ilə bağlı Birləşmiş Millətlər Təşkilatının Təhlükəsizlik Şurasına müraciəti Ermənistanın qəsdli olaraq və məqsədli şəkildə beynəlxalq hüquqa əsaslanan danışıqlara zərbə vurmasıdır.
Ermənistan problemin həllinə əngəl törətməklə, regionda davamlı sülhün bərqərar olması üçün yaranmış tarixi imkanı əldən verə bilər. Bununla da yalnız özünə ziyan vurur”, - deyən Aydın Hüseynov fikirlərini tamamlayıb.
Bölmənin digər xəbərləri
