Deputat: Məğlubiyyət ilə barışmayan qarşı tərəf öz aqressiv siyasətini nümayiş etdirir
Bakı, 11 oktyabr, AZƏRTAC
Sülhsevər Azərbaycan xalqının öz torpaqlarını erməni işğalçılarından azad etmək uğrunda apardığı mübarizədə əks tərəf çıxış yolunu qaçmaqda, təxribatda və provokasiyalarda tapıb. Ümumiyyətlə, dünyanın bütün güclü Qərb dövlətlərinin ikili siyasətinə görə, Azərbaycan bu torpaqları müharibə yolu ilə qaytara bilməzdi, onların fikrincə, bu, mümkün deyildi, yalnız sülh və danışıqlarla çıxış yolu tapmaq olardı. Ancaq Azərbaycan Ordusunun belə irəliləyişi həm açıq düşməni, həm də onun havadarlarını, türklərin gizli düşmənlərini də çaşqınlıq vəziyyətinə saldı. Əks-hücum əməliyyatlarında düşmənə sarsıdıcı zərbələr endirməklə torpaqlarımızı işğaldan azad edən Azərbaycan Ordusu öz qüdrətini bir daha bütün dünyaya nümayiş etdirdi.
AZƏRTAC xəbər verir ki, bu barədə Milli Məclisin deputatı Ülviyyə Ağayeva deyib.
O bildirib ki, əslində Azərbaycan Ordusu Ermənistana öz gücünü Aprel döyüşlərində göstərmişdi. Ancaq son döyüşlər miqyasına görə daha böyük oldu və işğalçı Ermənistan ordusunun və cəmiyyətinin bel sütununu qırdı, düşmən həm mənəvi, həm də fiziki cəhətdən tam süquta uğradı.
Bu on gün ərzində guya sülh tərəfdarları, əslində isə ermənilərin maraqlarını güdən, bütün mümkün və qeyri-mümkün vasitələrdən istifadə edərək yenə də bizi sülh danışıqlarına cəlb etməyən güclü dövlət qaldımı? Bu günlərdə bizə arxa, dayaq, dəstək olan Türkiyə, Pakistan və bir neçə dost ölkədən başqa. Ancaq Azərbaycan dövləti artıq qalib dövlət kimi öz sözünü və şərtlərini irəli sürmək hüququnu igid övladlarının qanı, canı bahasına qazanır. Elə buna görə də, yenə dövlətimizi sülh danışıqlarına çağırmağa başlasalar da, artıq Azərbaycan öz şərtlərini irəli sürməklə bu danışıqlara şans verdiyini bildirdi, bir daha göstərdi ki, o, sülhsevər dövlətdir, insan itkisinə yol vermək, qan tökmək istəmir.
Azərbaycan rəhbərliyi dünyaya göstərdi ki, ölkəmiz sülh tərəfdarı olsa da, bu yolla münaqişənin həlli mümkün olmayacağı təqdirdə, hərbi yolla torpaqlarını azad etməyə qadirdir. Ermənistanın havadarlarına bir daha aydın oldu ki, Azərbaycan işğalla heç zaman barışmayacaq, torpaqlarını düşmənə güzəştə getməyəcək. Torpaqdan pay olmaz. Bu, Azərbaycan xalqının həmişə əsas qayəsi olmuşdur.
Oktyabrın 9-dan 10-a keçən gecə Rusiyanın paytaxtı Moskva şəhərində Azərbaycan, Rusiya və Ermənistan Xarici işlər nazirlərinin 11 saatlıq üçtərəfli görüşündən sonra atəşkəslə bağlı bəyanat qəbul edilib.
Qəbul olunan bəyanata əsasən, 2020-ci il oktyabrın 10-da saat 12:00-dan etibarən humanitar məqsədlərlə Beynəlxalq Qırmızı Xaç Komitəsinin (BQXK) vasitəçiliyi və onun meyarlarına uyğun olaraq, hərbi əsirlər və digər saxlanılan şəxslər və ölənlərin meyitlərinin dəyişdirilməsi üçün atəşkəs elan olunub.
Danışıqların bu qədər uzun müddət (11 saat) davam etməsi prosesin mürəkkəbliyini və gərgin bir şəraitdə aparıldığını göstərir. Məlumdur ki, danışıqlar çərçivəsində qarşı tərəf həmişə olduğu kimi, özünə sərf edən şərtlərlə razılaşmaqda maraqlı idi. Ancaq bu da məlumdur ki, şərtləri həmişə qalib, güclü tərəf irəli sürür. Bu gün şərt qoymaq, tələblər irəli sürmək hüququnu biz öz qanımızla döyüşlərdə qazanmışıq. Prezident İlham Əliyevin dediyi kimi, indi Ermənistan bizim şərtlərlə razılaşmalı olacaq: “Biz nə desək, o da olacaq. Şans veririk ki, danışıqlar yolu ilə, sülh yolu ilə torpağımızdan çıxsın”.
On bir saat davam edən danışıqların nəticəsi özünü çox gözlətmədi. Bu mübarizədə məğlubiyyəti ilə barışmayan qarşı tərəf yenə öz aqressiv siyasətini nümayiş etdirdi. Azərbaycanın ikinci böyük şəhəri olan Gəncə şəhərinin mülki əhalisinin sıx yaşadığı məntəqələri ağır artilleriyadan atəşə tutdu. Onlarla insan, içərisində uşaqlar da olmaqla ağır xəsarət aldı. Bununla da onlar heç bir zaman müqavilələrə, verdikləri sözə əməl etmədiklərini və bundan sonra da etməyəcəklərini bir daha sübut etdilər. Yenə də təxribatlar davam etdirilir və Azərbaycan Ordusu Ali Baş Komandanın müdrik rəhbərliyi və sarsılmaz əsgərləri ilə bu həmlələrə layiqli cavab verir. Hadisələrin gedişatı göstərir ki, qələbə bizimlədir, o gün uzaqda deyil. Buna görə də biz hamımız Ali Baş Komandanın yanında olmalı, təxribatlara uymamalı, son 30 il ərzində bütün dünya ictimaiyyətinə çatdırılan yanlış məlumatları və ermənilərin gerçək üzünü ifşa etməklə dünya sülhsevər qüvvələrini bu haqq işimizə cəlb etməliyik.
Bölmənin digər xəbərləri
