Deputat: Qoşulmama Hərəkatı yenidən formalaşan dünya nizamında daha fəal rol almalıdır
Bakı, 6 iyul, AZƏRTAC
Azərbaycanın sədrliyi dövründə Qoşulmama Hərəkatı qlobal əhəmiyyətli bir sıra təşəbbüslərlə çıxış edib. Məhz Azərbaycanın qlobal çağırışlara cavab verən təşəbbüsləri bu təşkilatın beynəlxalq nüfuzunun artmasına mühüm töhfələr verib. Eyni zamanda, təbii ki, Azərbaycan dövlətinin də beynəlxalq münasibətlər sistemində yerinin daha da möhkəmlənməsinə stimul yaradıb.
Bunu AZƏRTAC-a açıqlamasında Milli Məclisin deputatı Ramin Məmmədov söyləyib.
O qeyd edib ki, BMT-nin Baş katibi Antonio Quterreşin Qoşulmama Hərəkatının Əlaqələndirmə Bürosunun nazirlər görüşünün iştirakçılarına müraciətində Azərbaycanın Qoşulmama Hərəkatına sədrliyi dövründə dünyanın üzləşdiyi çağırışların müzakirəsinə və həllinə töhfələr verdiyini vurğulaması ölkəmizin quruma uğurla sədrlik etdiyini bir daha təsdiqləyir.
Deputat bildirib ki, Azərbaycan 2019-cu ildə keçirilən XVIII sammitdə təşkilatın sədri seçildikdən sonra 2020-ci ilin may ayında Prezident İlham Əliyevin təşəbbüsü ilə Qoşulmama Hərəkatının COVID-19 ilə mübarizəyə həsr edilən onlayn sammiti keçirilib. Zirvə toplantısında Azərbaycan BMT Baş Assambleyasının liderlər səviyyəsində xüsusi sessiyasının çağırılmasını təklif edib. 2020-ci ilin dekabr ayında keçirilən tədbirdə bir çox ölkələrin dövlət və hökumət başçıları çıxış ediblər. Eyni zamanda, Qoşulmama Hərəkatı Azərbaycanın sədrliyi dövründə bütün ölkələrin peyvəndlərdən ədalətli və vahid şəkildə istifadəsini təmin etmək üçün 2021-ci ildə BMT-nin İnsan Hüquqları Şurasında və Baş Assambleyasında qəbul edilmiş iki qətnamənin təşəbbüskarı olub.
“Azərbaycan Qoşulmama Hərəkatının Parlament Şəbəkəsinin yaradılması təşəbbüsü ilə çıxış edib və Şəbəkənin ilk iclası 2022-ci ilin iyun ayında məhz Bakıda keçirilib. Bundan başqa, daha bir vacib uğur Şuşa Razılaşması əsasında Qoşulmama Hərəkatının Gənclər Təşkilatının yaradılması olub. Bütün bu qeyd olunan faktlar Azərbaycanın təşkilata fəal sədrliyinin nəticələridir. “Soyuq müharibə” dövründə bir sıra dövlətlərin iki siyasi-hərbi qütb arasında qarşıdurmaya cəlb edilməmələri üçün təsis olunan bu təşkilatın fəaliyyətinin əsasını təşkil edən Bandunq prinsipləri ədalətli, beynəlxalq hüquqa əsaslanan dünya düzənin qurulmasını arzulayan bütün dövlətlərin maraqlarına cavab verir. Çünki həmin prinsiplər BMT Nizamnaməsinə, eləcə də əsas insan hüquq və azadlıqlarına, dövlətlərin ərazi bütövlüyü və suverenliyinə hörmət etmək və digər müddəaları özündə ehtiva edir. 2020-2022-ci illərdə məhz Qoşulmama Hərəkatında təmsil olunan ölkələr anti-Azərbaycan mahiyyətli BMT-də bəyanatın qəbul edilməsinə mane oldular”, - deyə Ramin Məmmədov vurğulayıb.
Milli Məclisin deputatı qeyd edib ki, BMT-dən sonra ikinci böyük təsisat kimi tanınan Qoşulmama Hərəkatı yenidən formalaşan dünya nizamında daha fəal rol almalıdır. Onun fikrincə, BMT Təhlükəsizlik Şurasında daha çox ölkənin təmsil olunması və coğrafi baxımdan daha geniş ərazini əhatə etməsi, beləliklə də ədalətli, dünya dövlətlərinin əksəriyyətinin maraqlarına cavab verən tərkibinin genişləndirilməsi zəruridir.
Bölmənin digər xəbərləri
