Deputat: Yeni açılan obyektlər rayonların iqtisadi potensialını əhəmiyyətli dərəcədə gücləndirəcək
Bakı, 8 avqust, AZƏRTAC
Azərbaycanda vaxtilə qəbul olunmuş regionların sosial-iqtisadi inkişafına dair müvafiq dövlət proqramları uğurla icra edilib və hazırda da edilir. Bunu biz şəhər, rayon, kənd və qəsəbələrimizin hərtərəfli inkişafının timsalında aydın şəkildə görürük. Bu proqram çərçivəsində, bütün ölkə üzrə mühüm işlər görülüb. Bu isə regionlarımızın hərtərəfli inkişafına təkan verib.
Bunu AZƏRTAC-a açıqlamasında Milli Məclisin deputatı Vüqar İskəndərov deyib.
O bildirib ki, Prezident İlham Əliyevin avqustun 7-də bir sıra rayonlara səfəri zamanı etdiyi açılışlar da deyilənlərin növbəti sübutudur: “Məlumat üçün bildirim ki, dövlətimizin başçısı səfər çərçivəsində Qazax rayonunda Qarapapaq-Çaylı avtomobil yolunun açılışında iştirak edib, həmçinin, Dövlət Sərhəd Xidmətinin (DSX) Sərhəd Qoşunlarının “Qazax” Əlahiddə Sərhəd Diviziyasının qarnizon kompleksində və Qazax Müəllimlər Seminariyası ADA Universiteti Qazax Mərkəzində yaradılan şəraitlə tanış olub. Prezident İlham Əliyev Qazax şəhərinin su təchizatı və kanalizasiya sistemlərinin istismara verilməsi mərasimində, “Venzana” mebel fabrikinin açılışında, həmçinin “Bakı-Qazax-Gürcüstan ilə dövlət sərhədi magistral avtomobil yolunun Gəncə-Qazax-Gürcüstan ilə dövlət sərhədi hissəsinin 4 zolağa genişləndirilməsi layihəsi” çərçivəsində yenidən qurulan, ümumi uzunluğu 102 kilometr olan Gəncə-Qazaxbəyli hissəsinin açılışında iştirak edib. Dövlətimizin başçısı həmin gün Samux, Şəmkir və Bərdədə bir sıra açılışlarda iştirak edib”.
Prezident İlham Əliyevin Qazax, Şəmkir, Samux və Bərdə rayonlarına səfərini Azərbaycanın milli prioritetlərinə doğru daha bir əhəmiyyətli addım hesab edən deputat deyib: “Dövlətimizin başçısının açılışını etdiyi infrastruktur layihələri və obyektlər regionların paytaxtla müqayisə edilə biləcək yaşayış standartlarına malik olması və bölgələrimizin milli gəlirdə payının artırılması baxımdan çox önəmli hadisələrdir. Bu rayonların timsalında əldə edilən nəticələr ümumilikdə regionların sosial-iqtisadi inkişafı ilə bağlı qarşıya qoyulan hədəflərə çatıldığını təsdiqləyir. Bütün bunlar vətəndaş üçün gözəl şərait yaradılmasına hesablanıb. Hesab edirəm ki, dövlətimizin başçısının avqustun 7-də açılışında iştirak etdiyi obyektlər sözügedən rayonların gələcək iqtisadi potensialını böyük dərəcədə gücləndirəcək. Bu da öz müsbət təsirini bütün sahələrdə göstərəcək”.
Bölmənin digər xəbərləri
