Domodedovoda Azərbaycan xalqının ümummilli lideri Heydər Əliyevin xatirəsi anılıb
Moskva, 12 dekabr, AZƏRTAC
Azərbaycan xalqının ümummilli lideri Heydər Əliyevin vəfatının növbəti ildönümü ərəfəsində Domodedovoda, Ümumrusiya Azərbaycanlılar Konqresinin (ÜAK) Moskva vilayət nümayəndəliyinin binasında “Heydər Əliyev Rusiyanın böyük dostudur” mövzusunda konfrans keçirilib. Konfransın təşəbbüsçüləri və təşkilatçıları ÜAK-ın Moskva vilayət nümayəndəliyinin rəhbəri Əlizaman Rəhimov və qurumun icraçı direktoru Araz Mürsəliyevdir.
Ulu öndəri şəxsən tanıyan Rusiyanın görkəmli dövlət və ictimai xadimləri, Azərbaycanın RF-dəki səfirliyinin, Domodedovo Şəhər İnzibati Dairəsi rəhbərliyinin nümayəndələri, Moskva Vilayət Sovetinin və Domodedovo Şəhər İnzibati Dairəsinin Deputatlar Sovetinin deputatları, Ümumrusiya Azərbaycanlılar Konqresinin fəalları dünya miqyaslı siyasi xadim və böyük insan haqqında xatirələrini bölüşüblər.
Domodedovo Şəhər İnzibati Dairəsinin Deputatlar Sovetinin deputatı, Rusiyanın qocaman inşaatçısı, ÜAK-ın Moskva vilayət nümayəndəliyinin rəhbəri Əlizaman Rəhimov bildirib ki, Heydər Əliyev SSRİ Nazirlər Sovetinin sədrinin müavini vəzifəsində işləyəndə Sovet İttifaqının Ulyanovsk, Həştərxan, Voloqda, Taqanrok kimi şəhərlərində bir çox irimiqyaslı layihələrin təşəbbüskarı və kuratoru olub. Buryatiya Respublikasında həyata keçirilmiş dövlət layihələrinin bir çoxu Heydər Əliyevin adı ilə bağlıdır.
Əlizaman Rəhimov deyib: “Məsələn, Ulyanovskda iri körpünün inşası ilə bağlı ideyanın həm tərəfdarları, həm əleyhdarları olub. Bu məsələ SSRİ rəhbərliyində müzakirə olunanda Heydər Əliyev tərəfindən dəstəklənib. Həmin körpü sayəsində bu gün Ulyanovsk Avropa ilə Asiya arasında nəqliyyat qovşağına çevrilib. Bu da həmin regiona çoxlu investisiyaların yatırılmasına şərait yaradıb”. Ümummilli Liderin Rusiyanın və bütün Sovet İttifaqının qarşısında xidmətlərinə toxunan Ə.Rəhimov nəhəng tikinti meydanı olan BAM-ı xatırladaraq bildirib ki, onun böyük hissəsi Heydər Əliyevin SSRİ Nazirlər Sovetində işlədiyi illərdə həyata keçirilib.
Giriş nitqindən sonra Rusiyanın görkəmli dövlət xadimlərinin Azərbaycan xalqının ümummilli lideri Heydər Əliyevin fəaliyyəti haqqında müsahibələri əsasında hazırlanan videoçarx nümayiş etdirilib.
Domodedovo Şəhər İnzibati Dairəsi administrasiyasının başçısı Dmitri Qorodetski bildirib ki, Heydər Əliyevin böyük idarəçilik potensialı və dövlət quruculuğu sahəsində misilsiz təcrübəsi olub. O deyib: “Biz bir vaxtlar ümumi olan vətənimizin hərtərəfli inkişafına böyük töhfə vermiş bu böyük insanın xatirəsini azərbaycanlılar ilə birlikdə anmağımızı çox yüksək qiymətləndiririk. Sevindirici haldır ki, Rusiyanın tamhüquqlu vətəndaşları olan, şəhərimizin sosial-iqtisadi həyatının müxtəlif sahələrində çalışan azərbaycanlılar öz qurucu əməkləri ilə onun müəyyən etdiyi səviyyəni bu gün saxlayırlar. Biz Rusiyada böyük məmnunluq hissi ilə belə bir faktı təsdiq edirik ki, Heydər Əliyevin fəaliyyəti, onun sarsılmaz kursu gündən-günə çiçəklənən Azərbaycanın indiki rəhbərliyi, Prezident İlham Əliyev tərəfindən uğurla davam etdirilir.
Azərbaycanın Rusiyadakı səfirinin müavini Qüdsi Osmanov diqqəti Rusiyada yaşayan azərbaycanlıların birləşməsində ümummilli lider Heydər Əliyevin müstəsna rolu üzərində cəmləşdirib. Heydər Əliyevi Azərbaycan xalqının birliyinin əsas ideoloqu və müasir Azərbaycan dövlətinin banisi adlandıran Q.Osmanov xatırladıb ki, Ümummilli Lider səfərləri zamanı iş cədvəlinin gərgin olmasına baxmayaraq müxtəlif ölkələrdə yaşayan azərbaycanlılar ilə görüşmək, onların ehtiyaclarını və arzularını öyrənmək üçün həmişə vaxt tapıb. Q.Osmanovun fikrincə, Rusiya azərbaycanlılarının, eləcə də bütün dünya azərbaycanlılarının birləşməsində Heydər Əliyevin rolunu qiymətləndirmək çətindir. Q.Osmanovun sözlərinə görə, ötən əsrin 60-70-ci illərində Heydər Əliyev hər il yüzlərlə azərbaycanlını Rusiyanın və keçmiş sovet respublikalarının şəhərlərinə oxumağa göndərirdi. Hazırda onlar öz qurucu əməkləri ilə Azərbaycanın müsbət imicini formalaşdırır, Azərbaycan-Rusiya münasibətlərinin daha da möhkəmlənməsinə və inkişafına sanballı töhfə verirlər. Çıxışının sonunda Q.Osmanov bu son dərəcə əhəmiyyətli tədbirin təşkilinə görə Əlizaman Rəhimova və Araz Mürsəliyevə təşəkkür edib.
Rusiya azərbaycanlılarının təşkilatlanmasında Heydər Əliyevin roluna dəqiq qiymət gecənin təşkilatçısı, ÜAK-ın Moskva vilayət nümayəndəliyinin icraçı direktoru Araz Mürsəliyevin dilindən səslənib. O deyib: “Hamıya məlumdur ki, Ümumrusiya Azərbaycanlılar Konqresinin banisi Heydər Əliyev olub. 2000-ci ildə onun təşəbbüsü ilə Rusiyanın hər yerindən görkəmli həmvətənlərimiz onun ətrafına toplaşaraq, bu ölkənin 80-dən çox subyektini əhatə edən, Ümumrusiya Azərbaycanlılar Konqresi adlanan monolit diaspor strukturu yaradıblar. ÜAK 14 illik tarixi ərzində xalq diplomatiyasının parlaq örnəyi olub, Rusiya-Azərbaycan münasibətlərinin əhəmiyyətli amilinə çevrilib. A.Mürsəliyev əlavə edib ki, “Heydər Əliyev Azərbaycanın rus icmasının birləşməsini də dəstəkləyib və bu qurumun fəaliyyətinə diqqət yetirib”.
SSRİ Nazirlər Soveti sədrlərinin çoxunun köməkçisi olmuş İqor Prostyakov çıxışında deyib ki, Heydər Əliyev kimi şəxsiyyətlər min ildə bir dəfə dünyaya gəlir.
ÜAK-ın icraçı direktoru İlqar Hacıyev çıxışında Rusiyanın birləşmiş Azərbaycan diasporunun yaradılmasında, xüsusən Azərbaycan-Rusiya münasibətlərinin prioritet inkişafında Ulu Öndərin müstəsna rolunu vurğulayıb. Onun sözlərinə görə, Azərbaycan ilə Rusiya arasında dostluq körpüsü rolu oynayan vahid Azərbaycan təşkilatının əsasını qoyan Heydər Əliyev bununla hazırda azərbaycanlıların Ümumrusiya Azərbaycanlılar Konqresi kimi federal miqyaslı təşkilatının fəaliyyətində təcəssüm olunan tarixi təşəbbüsün müəllifi olub.
General-polkovnik, keçmişdə 35-ci ordunun komandanı olmuş İvan Morozov, Böyük Vətən müharibəsi veteranı İvan Nikonov, sovet illərində Azərbaycan daxili işlər nazirinin müavini işləmiş Vladislav Şevtsov, Heydər Əliyevin silahdaşları, ictimaiyyətin nümayəndələri də böyük dövlət və siyasi xadim Heydər Əliyevin şəxsiyyətinin miqyası barədə xatirələrini bölüşüblər.
Fəridə Abdullayeva
AZƏRTAC-ın xüsusi müxbiri
Moskva
Bölmənin digər xəbərləri
